Wenye Blogu waaswa kuepusha migogoro

Dar es Salaam

Wamiliki wa blogu nchini wametakiwa kufuata maaadili ya uandishi wa habari ikiwemo kuandika habari zenye ukweli na uhakiki ili kuepusha migogoro isiyo ya lazima kati yao na wananchi.

Mkurugenzi mkuu wa mamlaka ya mawasiliano (TCRA), Profesa John Mkoma alisema hayo jana, alipozungumza na wamiliki wa blogu kuhusu umuhimu wa kufuata kanuni za kuripoti Uchaguzi wa serikali za mitaa na ule mkuu zilizowekwa na mamlaka hiyo.

Profesa Mkoma alisema wanatambua umuhimu wa blogu katika kuwapa habari wananchi na kuwataka wamiliki hao kupitia kanuni hizo ili ziwasaidie kujiimarisha kiuandishi.

“Mwaka huu na mwaka ujao ni kipindicha uchaguzi hivyo blogu hizi zinatakiwa zifuate misingi hiyo katika kuripoti habari hizo za uchaguzi,” alisema Profesa Mkoma.

Mwandishi wa blogu ya ‘Hivi sasa’, Mgisha Nduguru alisema kanuni hizo zitawasaidia kujenga uaminifu kwa jamii na kutambulika rasmi kama chombo cha habari kama yalivyo magazeti na televisheni.