Watanzania washauriwa kusoma kwa makini Katiba iliyopendekezwa

Mkuu wa Mkoa wa Morogoro, Dk. Joel Bendera (katikati) akiwa pamoja na Naibu Makamu Mkuu wa Chuo Kikuu Mzumbe, Taaluma, Prof. Josephat Itika (kushoto) na Mwenyekiti wa Baraza la Chuo hicho, Prof. Daniel Mkude (kulia) wakati wa kongamano la Siku ya Nyerere lililofanyika katika chuo hicho mjini Morogoro jana.

Mwenyekiti wa Baraza la Chuo Kikuu Mzumbe, Prof. Daniel Mkude (katikati) akisisitiza jambo wakati wa kongamano la Siku ya Nyerere lililofanyika katika chuo hicho mjini Morogoro jana.  Kushoto ni Naibu Makamu Mkuu wa Chuo Kikuu Mzumbe, Taaluma, Prof. Josephat Itika na Naibu Makamu Mkuu wa Chuo hicho, Utawala na Fedha, Prof. Faustin Kamuzora (kulia).

Na Mwandishi wetu, Morogoro

Watanzania wameshauriwa kuisoma kwa makini Katiba iliyopendekezwa na lililokuwa Bunge la Katiba ili wasiyumbishwe na kauli zinazotolewa na watu mbalimbali kwa vile katiba hiyo imetungwa kwa kushirikisha makundi ya wadau wote hapa nchini.

Mkuu wa Mkoa wa Morogoro,Dkt. Joel Bendera alisema hayo wakati alipokuwa akifungua Kongamano la siku ya kumuenzi Hayati Baba wa Taifa, Mwalimu Julius Nyerere liloandaliwa na Chuo Kikuu Mzumbe jana mjini Morogoro.

Alisema wananchi waisome vizuri katiba hiyo ili wasiyumbishwe na kauli zinazoibeza.

“Katiba iliyopendekezwa na bunge la Katiba imetungwa kwa kufuata misingi ya demokrasia na ilishirikisha wadau wote hapa nchini,”alisema

Alisema katiba hiyo imesheheni maswala yote ya msingi ukilinganisha na Katika ya mwaka 1977, hivyo ni vyema kuitafakari wakati nchi ikiwa inaelekea katika kura ya maoni.

Mada kuu ya Kongamano hilo ilikuwa ni ‘Mtazamo wa Mwalimu kuhusu katiba kama chombo cha kujenga demokgrasia ya kweli.’