Soko la mitumba lazua mvutano

Moshi

Mbunge wa Moshi mjini, Philemon Ndesamburo, (CHADEMA) ameamua kujenga soko  la kisasa eneo la Kiboriloni litakalo kuwa na vibanda 200 na eneo la wazi kwa ajili ya wafanyabiashara wa mitumba.

Hata hivyo wakati mbunge huyo akisema hayo, Mkuu wa Mkoa wa Kilimanjaro, Leonidas Gama alisema mpaka sasa ofisi yake haina taarifa kama miongoni mwa biashara zitakazorejeshwa ni pamoja na ya mitumba.

Alisema taarifa zilizopo sasa zinasema soko hilo halitarejeshwa tena katika eneo hilo.

“Awali kulikuwa na soko la mitumba, likahamishwa na halimashauri tukasema mazingira yale si salama, soko hilo halipaswi kurejeshwa tena” alisema.

Naye Meya wa Manispaa ya Moshi, Jaffar Michael alisema azimio la Baraza la Madiwani lililotolewa katika kikao cha Julai, 2011, lilipitisha kuwa soko hilo lirejeshwe. Alisema suala hilo linakwamishwa na Watendaji wachache kwa maslahi ya kisiasa.

Akizungumza na gazeti hili jana. Ndesamburo anashangaa kuona serikali ya mkoa ikigoma kurejesha soko hilo la mitumba bila kutoa sababu za msingi na hata wanazozitoa bado ni nyepesi.

“Nimejenga soko hili ili kuwasaidia wafanyabiashara wapate eneo la kufanyia biashara. Nataka likikamilika liwe ni eneo la kisasa la kibiashara ambalo litajulikana ulimwenguni pia” alisema.