Mvua yaleta maafa Bunda

Na Mwandishi wetu

Watoto wawili wemejeruhiwa mmoja kwa kuvunjika mkono baada ya kuangukiwa na ukuta kufuatia mvua kubwa iliyoambatana na upepo mkali kunyesha katika Wilaya ya Bunda mkoani Mara.

Diwani wa Kata Guta wilayani Bunda, Mwita Mang’era, alisema mvua hiyo ilinyesha katika kijiji cha Nyabehu na kusababisha madhara kwa watoto hao wawili.

Mang’era alifafanua kuwa mvua hiyo ilinyesha juzi kwa takriban saa tatu mfululizo.

Aliwataja watoto waliojeruhiwa ambao ni familia moja kuwa ni Wambura Wambura(9) na Maswi Wambura(4), aliyevunjika mkono.

“Watoto hao walikuwa ndani ya nyumba wakati mvua hiyo ikinyesha,” alisema.

Kwa mujibu wa Mang’era, mbali ya watoto hao kujeruhiwa , pia mvua hiyo ilibomoa nyumba 23 kijijini hapo na kusababisha wanafamilia zaidi ya 140 kukosa mahali pa kuishi pamoja na kubomoa ofisi ya kijiji.