TRA yaonya wasiotumia EFD

Mwanza

Mamlaka ya Mapato Tanzania (TRA), Mkoa wa Mwanza imesema haitasita kuwachukulia hatua za kisheria wafanyabiashara watakaokaidi agizo la serikali la kutumia mashine za kielektroniki (EFD) kutoa risiti za uuzaji wa bidhaa.

Kaimu Meneja wa TRA Mkoa wa Mwanza, Peter Shewiyo, alisema hayo wakati wa maadhimisho ya wiki ya "Mlipa kodi" Kanda ya Ziwa, yaliyofanyika jijini hapa juzi.

Shewiyo alisema hawatasita kuwachukulia hatua wafanyabiashara waatkaoshindwa kufuata kanuni na sheria ambazo zinaelekeza kutumia mashine hizo, kwa kuwa kufanya hivyo kunaikosesha serikali mapato.

Alisema wafanyabiashara wakitumia mashine hizo zitawapunguzia wizi, hivyo kuongeza pato la taifa na kuwanufaisha wao katika kutunza takwimu kwa usahihi.

“Mfanyabiashara yeyote ambaye hatumii mashine za EFD  kisheria hairuhusiwi kufanya biashara na endapo tukikuta mfanyabiashara ambaye biashara yake ni kuanzia Sh. Milioni 18 tutamshtaki,” alisema.