Serikali kuanzisha chama cha wafugaji nyuki

Arusha

Serikali imesema itaratibu uanzishwaji wa chama cha wafugaji nyuki nchini, ambapo kwa kuanzia imeteua kikosi kazi kwa ajili ya shughuli hiyo.

Hayo yameelezwa juzi na Waziri wa Maliasili na Utalii, Lazaro Nyalandu wakati akifungua kongamano la nyuki na ufugaji nyuki, (APIMONDIA), ambapo alimteua Mkuu wa Mkoa wa Singida, Parseko Kone kuwa mwenyekiti wa kikosi kazi cha uanzishwaji wa chama hicho.

“Wakati akifungua kongamano hilo ambalo ndilo la kwanza kabisa kufanyika barani Afrika, Waziri Mkuu aliagiza kuanzishwe chama cha wafugaji nyuki hapa nchini hivyo kwa mamlaka niliyokabidhiwa natangaza rasmi kuwa serikali ndiyo itaratibu uanzishwaji wa chama hicho,” alisema.

Mbali na Kone, Nyalandu pia alimteua Ofisa Mtendaji Mkuu wa Wakala wa Huduma za Misitu nchini (TFS), Juma Mgoo kuwa katibu wa kikosi kazi hicho.

Aliwataja wajumbe wa kikosi kazi hicho kuwa ni pamoja na Mwenyekiti wa TFS, Esther Mkwizu, mjumbe kutoka uongozi taasisi isiyo ya kiserekali ya wafugaji nyuki na mwakilishi wa wasomi ambaye alisema atawakilisha mawazo ya wasomi katika uaznishwaji wa chama hicho na uendelezaji wa sekta ya nyuki kwa ujumla.