Mlinzi wa Rais Sudani auawa

Na Mwandishi wetu

Walinzi wawili wa usalama wameuawa na mtu aliyekuwa na kisu, nje ya Ikulu ya Rais wa Sudan iliyopo jijini Khartoum.

Kwa mujibu wa Msemaji wa Ikulu nchini humo, mvamizi huyo alinyanyua silaha ya mmoja wa walinzi  ndani ya Ikulu hiyo, kabla ya kuonekana na kuuliwa na mlinzi mwingine.

Alisema mtu huyo alionekana kuwa na matatizo ya akili. Rais Omar al- Bashar hakuwepo katika aneo hilo wakati wa uvamizi huo

Bashir aliingia madarakani mwaka 1989 ambapo mwezi uliopita, alitangaza kuendelea kuwania tena nafasi hiyo katika uchaguzi mkuu unaotarajiwa kufanyika nchini humo mwakani.

Katibu wa Habari na mawasiliano wa Ikulu, Emad Ahmed alisema mvamizi huyo alipigiwa kelele lakini hakuacha kushambulia walinzi.

Aliendelea  kuwashambulia hadi pale alipopigwa risasi hadi kufa na mmoja wa walinzi waliokuwepo katika eneo hilo.

Mahakama ya Kimataifa ya Jinai (ICC) ambayo Sudani haitambui, imemshitaki Rais Bashir, kwa mauaji ya kimbari yaliyofanyika Darfur, mashtaka ambayo Rais huyo aliyakanusha.

Umoja wa Afrika (AU) unamuunga mkono Rais huyo katika kukana mashtaka hayo yaliyotolewa na mahakama hiyo iliyopo The Hague, Uholanzi.