NFRA, kununua Mahindi, Gairo.

Gairo

Wakala wa taifa wa hifadhi ya chakula (NFRA) ina mpango wa  kununua tani 2,500 za mahindi katika Wilaya ya Gairo.

Akizungumza katika kikao cha kawaida cha Baraza la Madiwani jana, Kaimu Ofisa kilimo wa Wilaya, Milaho Cuthbert alisema NFRA itanunua mahindi kwa Sh500 kwa kilo.

Cuthbert, alisema ununuzi huo utafanyika katika kata 10 na mgawanyo wa tani zitakazonunuliwa kwa kila kata utazingatia wastani wa mavuno ya mahindi kwa kila Kata.

Akizungumzia mpango wa ruzuku ya pembejeo za kilimo, Cuthbert alisema katika utekelezaji wa mpango huo kwa msimu wa 2014/2015, Serikali imeweka utaratibu wa utoaji wa mikopo kwa vikundi vya wakulima wa mikoa 24 kwa ajili ya mazao ya mahindi na mpunga.

Alisema mikopo hiyo itatolewa kupitia benki za biashara za wananchi ambazo zitasaini mikataba na vikundi vya wakulima hao.

Wakizungumza na gazeti hili baadhi ya wakulima wameishukuru serikali kwa kuwahakikishia ununuzi wa mahindi yao na kwa kuwapatia soko la uhakika.