Acheni kuwabembeleza wawekezaji wasiozingatia sheria za mazingira.

Mbeya

Maofisa mazingira katika wilaya za mikoa ya Iringa na Mbeya wametakiwa kuacha kuwabembeleza wawekezaji wasiozingatia sheria za uhifadhi wa mazingira.

Kauli hiyo imetolewa na Kaimu Katibu Tawala wa Mkoa wa Mbeya, Costantine Mushi, wakati akifungua mafunzo ya siku tano yaliyoshirikisha maofisa mazingira kutoka wilaya 14 za mikoa hiyo, Baraza la Taifa la Hifadhi na Usimamizi wa Mazingira (NEMC), na Ofisi ya Mkemia Mkuu wa Serikali.

Mushi alisema wapo baadhi ya wawekezaji wa sekta za madini na n ishati wasiozingatia sharia ya mazingira ya mwaka 2004 inayotaka shughuli yoyote ya maendeleo kuendana na uhifadhi wa mazingira na hivyo kuchangia uharibifu mkubwa wa mazingira.

Alisema kuwa maofisa wa mazingira wanatakiwa kusimamia sheria za mazingira kwa kuhakikisha kuwa zinafuatwa ikiwa ni pamoja na kuwachukulia hatua kali wawekezaji wasio fuata sheria hizo.

Alisema, katika sekta ya nishati, kuna shughuli za utafutaji wa mafuta na gesi unaoendelea sehemu mbalimbali nchini katika nchi kavu, kwenye ukanda wa bahari, katika maji ya kina kirefu baharini (deep sea), na kwenye maziwa na kusisitiza kuwa, hii ni changamoto kwa maofisa mazingira katika kutoa ushauri na kuhakikisha kuwa binadamu na viumbe hai hawaathiriki na uwekezaji huo.