TPC, Zantel zaingia mkataba

Dar es Salaam

Shirika la Posta Tanzania (TPC), limeweka saini makubaliano ya ushirikiano katika utoaji huduma kwa umma na Kampuni ya simu ya Zantel.

Makubaliano hayo yamefikiwa baada ya kukamilika kwa utafiti wa majaribio wa utendaji uliofanywa Zanzibar na mkoani Dodoma.

Akizungumza katika hafla fupi ya makubaliano hayo, yaliyofanyika jana, Dar es Salaam, Mkurugenzi Mkuu wa TPC, Deos Mndeme, alisema makubaliano hayo yanatokana na malengo ya shirika hilo, kuwafikia wananchi wengi kwa kiwango bora cha huduma na kwamba ni muhimu kushirikiana na kampuni nyingine ili kuboresha huduma hizo.

Mndeme alisema wamehamia kwenye utoaji huduma inayohusisha Teknologia ya Habari na Mawasiliano (TEHAMA), huduma ambayo itarahisisha utendaji kazi wa shirika na kuongeza faida maradufu kutokana na uharaka wake.

Alisema waliamua kuchagua Zantel kufanya nao kazi, hasa kwenye masuala yanayohusu huduma za mtandao kutokana na ubora wake katika teknolojia hiyo.