Watano wauawa mgogoro wa ardhi Kiteto

Na mwandishi wetu

Watu watano wa kijiji cha Matui, Kata ya Matui Wilaya ya Kiteto mkoani Manyara, wamepoteza maisha na mwingine kujeruhiwa kutokana kuibuka mgogoro kati ya wakulima na wafugaji uliodumu kwa muda mrefu.

Chanzo cha mauaji hayo kimeelezwa kuwa ni mkulima mmoja, Hassani Nkondeja (52) kuuawa na watu wanaodaiwa kuwa ni wafugaji (Wamasai) akiwa shambani kwake kisha mwili wake kutupwa kwenye shimo kutoka eneo alilouawa.

Wengine waliouawa ni pamoja na Julias Ibuma(54) na mtu mmoja aliyejulikana kwa jina moja la Jobu ambaye amedaiwa kukatwa na kitu chenye ncha kali shingoni huku mwingine mwanamke ambaye jina lake halikufahamika mapema.

Kwa mujibu wa Jeshi la Polisi Mkoa wa Manyara, jitihada za kuzuia mapigano hayo zinaendelea na kwamba kundi kubwa la wananchi linakimbilia polisi na maeneo ya nyumba za ibada kunusuru maisha yao.