Wasomi wamuenzi Mwalimu kwa vitendo—Prof. Kamuzora

Na Mwandishi wetu, Morogoro

Changamoto imetolewa kwa wasomi nchini kutumia taaluma zao kubuni njia zitakazoleta suluhisho la matatizo na changamoto mbalimbali za wananchi na kuleta maendeleo ya kijamii na kiuchumi.

Kwa mujibu wa naibu makamu mkuu wa Chuo Kikuu Mzumbe, Utawala na Fedha, Profesa Faustin Kamuzora, ni kwa kuchukua hatua madhubuti za kutumia taaluma zao kusaidia jamii ndipo wasomi hao watakuwa wamemuenzi hayati baba wa Taifa kama inavyotakiwa.

Alikuwa akiongea hivi karibuni wakati wa Kongamano la siku ya kumuenzi hayati Baba wa Taifa, Mwalimu Julius Nyerere liloandaliwa na chuo hicho mjini Morogoro.

“Taaluma zetu zitumike kutafuta majawabu ya sera na uvumbuzi wa aina mbalimbali ambao utasaidia kuleta mapinduzi ya kiuchumi, kijamii na kitamaduni,”alisema.

Alisema watu wengi wamekuwa wakijipambanua kwa usomi wao lakini hawakumbuki kuwa wana deni kwa jamii la kuwaletea majawabu ya matatizo yao kupitia taaluma hizo.

“Kazi zetu zituonyeshe kuwa sisi ni wasomi,”alisema.

Alisema hakuna faida ya kujiita msomi wakati hakuna jambo hata moja la kitaaluma ambalo mtu amelifanya kwa ajili ya taifa.

Alisema wakati nchi inapomkumbuka baba wa taifa, ni vyema wasomi wakaiga mfano wake, kwani aliweza kuonyesha mfano kwa vitendo, kuongoza nchi kwa uadilifu uliotukuka na kuandika vitabu mbalimbali.

“Tuige mfano wa baba wa taifa kwa kutenda na kazi zetu zionekane na kuleta faida kwa jamii zetu na taifa kwa ujumla,” alisema.