Madaktari wanaotoa mimba kinyume na taratibu kukiona

Dodoma

Serikali imesema itaendelea kuwachukulia hatua kali za kisheria na za kinidhamu madaktari wote watakaogundulika kujihusisha na utoaji wa mimba kinyume na utaratibu.

Kauli hiyo ilitolewa bungeni jana na Naibu Waziri wa Ofisi ya Waziri Mkuu, Tawala za Mikoa na Serikali za Mitaa (TAMISEMI), Aggrey Mwanri alipokuwa akijibu swali la Mbunge wa Dimani, Abdallah Sharia Amer kwa niaba ya Waziri wa Afya na Ustawi wa Jamii.

Mbunge huyo alitaka kujua serikali inasema nini kuhusu suala la madaktari kuwatoa mimba wanafunzi.

Pia, alitaka kujua kama Serikali inalitambua suala hilo,imechukua hatua gani za makusudi kukabiliana nalo.

Akijibu swali hilo, Mwanri alisema utoaji mimba ni kosa la jinai ambalo linasimamiwa na Sheria ya Kanuni ya Adhabu namba 16.

Aidha, alisema kitendo cha daktari kufanya utoaji wa mimba ni kinyume na maadili ya taaluma ya uganga.

Alisema daktari au mtaalamu wa afya endapo atapatikana na kosa kutoa mimba huchukuliwa hatua za kinidhamu bila kujali cheo cha daktari husika.

“Suala la kumtoa mimba mama mjamzito linaweza kufanyika tu pale ambapo itathibitishwa na jopo la madaktari kuwa kuendelea kwa mimba hiyo kutahatarisha maisha ya mama,” alisema

Alisema hatua mbalimbali zimechukuliwa na Serikali ili kukabiliana na tatizo la utoaji wa mimba ikiwamo kuwakumbusha mara kwa mara viongozi wa hospitali zote na vituo vya huduma za afya nchini kusimamia kanuni za utumishi wa umma na maadili ya kitaaluma.