Maghembe asisitiza matumizi ya TEHAMA sekta ya maji

Na Mwandishi wetu, Dodoma

Matumizi sahihi ya teknolojia ya kisasa yametajwa kama nyenzo muhimu itakayosaidia kuendelea kutoa huduma bora za maji kwa wakazi wa mijini na vijijini hapa nchini.

Kwa sababu hiyo, serikali imesema suala la kujenga uwezo wa raslimali watu na vifaa mbalimbali vya kusimamia mifumo ya maji kwa kuzingatia teknolojia mpya lina umuhimu wa kipekee ili kufikia malengo ya huduma za maji kwa kasi zaidi.

Waziri wa Maji, Prof. Jumanne Maghembe amesema hayo wakati wa mkutano wa 15 wa mwaka wa Mamlaka za Majisafi na Usafi wa Mazingira Mijini hivi karibuni mjini Dodoma.

”Teknolojia inabadilika kila kukicha na uendelezaji wa huduma ya maji unahitaji kwenda sambamba na mabadiliko hayo,” alisema Waziri Maghembe.

Akitoa mfano, alisema Mamlaka zitumie teknolojia (ICT) katika utoaji huduma, ukusanyaji wa takwimu, utayarishaji wa ankara na malipo na vifaa vya kujua upotevu wa maji, ili kuendana na mabadiliko ya ukuaji wa teknolojia.

Mada kuu ya Mkutano huo ilikuwa “Usimamizi wa Miundombinu ya Maji kwa Uendelevu wa Mamlaka za Majisafi na Usafi wa Mazingira Nchini”

Pamoja na changamoto zilizopo, Prof. Maghembe alizipongeza Mamlaka za Mikoa kwa jukumu kubwa la kutekeleza lengo la kuwapatia Watanzania huduma ya maji safi na salama.