Kamati ya Bunge TAMISEMI yashauri DART kupatiwa sehemu ya kodi ya mafuta

Na Mwandishi Wetu, Dar es Salaam

Wizara ya Tawala za Mikoa na Serikali za Mitaa (TAMISEMI) imetakiwa kuharakisha mchakato wa kupata sheria  itakayosaidia Wakala wa Mradi wa Mbasi Yaendayo Haraka (DART) kupata sehemu ya kodi ya mafuta ili zisaidie ukarabati miundombinu yake.

Mwenyekiti wa Kamati ya Bunge TAMISEMI, Dk. Hamisi Kigwangala aliwaambia waandishi wa habari mwishoni mwa wiki kuwa sheria hiyo ikiwa tayari itasaidia wakala huo kuwa na nguvu za kifedha kusaidia katika shughuli za ukarabati wa miundombinu yake.

“Mradi huu ni wetu sisi sote hivyo ni jambo jema kukawa na sheria kama  hii ya kupata fedha toka kodi ya mafuta,”alisema jijini Dar es Salaam baada ya kikao kati ya kamati yake na uongozi wa wakala wa DART.

Alisema miundombinu hiyo imejengwa kwa gharama kubwa na ni lazima pawe na utaratibu wa kuifanyia ukarabati kwa wakati unaotakiwa ili iweze kuwa endelevu na kutoa huduma bora.

Pia alielezea haja ya serikali kuwa mkakati endelevu wa miradi ya barabara, reli, barabara za juu katika maeneo yote ya nchi yanayokua kwa haraka.

Alisema kwa sasa serikali inaingia gharama kubwa ya kulipa fidia wananchi maeneo yao kupisha miradi kama hiyo kwa sababu hakuna mikakati endelevu na mipango ya muda mrefu.

“Ni vyema jambo hili likafanyika mapema katika halmashauri zetu na majiji ili kuokoa gharama siku za baadaye,” alisema.

Kwa upande wake, Mtendaji Mkuu wa DART, Bi, Asteria Mlambo alisema wakala umeshapeleka maombi maalumu Wizara ya Ujenzi ili kupatiwa fedha za matengenezo ya barabara za mradi zitokanazo na makusanyo ya kodi ya mafuta.