Bidhaa kutoka nje zawatesa wakulima

Arusha

Serikali imeshauriwa kutazama upya utaratibu wa kutoa vibali vya kuingiza nchini bidhaa mbalimbali kutoka nje ikiwamo sukari, ili kuwasaidia wakulima kupata soko la mazao wanayozalisha.

Mwenyekiti wa Umoja wa Taasisi ya Fedha Tanzania (TBA), Dk Charles Kimei alitoa wito huo hivi karibuni katika mkutano wa 17 wa TBA unaoendelea kufanyika jijini Arusha unaojadili changamoto na fursa zilizopo katika sekta ya kilimo.

Dk Kimei alisema kuingizwa nchini kwa bidhaa kama sukari, kumesababisha viwanda vinavyozalisha bidhaa hiyo kushindwa kupata soko la uhakika la ndani na wakulima wanaolima miwa kwa ajili ya uzalishaji  wa sukari kushindwa kuuza zao hilo kwa wakati.

“Suala hili siyo tu linawaathiri wakulima bali pia linaathiri taasisi za fedha ambazo zinasaidia sekta ya kilimo,” alisema Kimei.

Katika hatua nyingine, Kimei alitoa wito kwa serikali kuunda bodi mbalimbali za mazao zitakazokuwa na jukumu la kuwatafutia masoko ya mazao wanayozalisha wakulima nchini.

Tanzania yaongoza EAC kuvutia wawekezaji

Dar es Salaam

Tanzania ni nchi ya kwanza kwa Afrika Mashariki kaika kuvutia uwekezaji kutokana na sera iliyopo ikiwamo kudhibiti mfumuko wa bei.

Hayo yalisemwa mwishoni mwa wiki na Mwenyekiti wa Bodi wa Mfuko wa Uwekezaji wa Umoja (UTT), Profesa Joseph Kuzilwa, wakati akifungua Mkutano mkuu wa tisa wa mwaka wa wawekezaji wa Mfuko wa Umoja.

Alisema mbali na Tanzania kushika nafasi ya kwanza, Pia ni ya nane kwa ukanda wa Jangwa la Sahara kwa uwekezaji.

Katika mkutano huo, Profesa Kuzilwa alisema mfuko huo umekua kwa kiwango cha asilimia 51.2 kutoka Sh 118.3 billioni mwaka 2012/13 hadi kufikia Sh 178.9 billioni mwaka huu.

“Idadi ya wawekezaji kwenye mfuko huu imeongezeka na kufikia 117,471 kwa mwaka wa fedha ulioshia Juni 30, mwaka huu na kwamba Mfuko wa Umoja pekee umeongezeka kwa kiwango cha asilimia 51.3 kutoka Sh 162.2 bilioni na wawekezaji kwenye mfuko huo walioongezeka kutoka 106,266 hadi 107,376,” alisema Profesa.

Aliitaja changamoto inayowakabili kuwa ni mabadiliko ya teknolojia yaliyosababisha meneja wa mfuko kuendelea kuwekeza katika tehama ili kuendana na ukuzaji wa soko na kufikia matarajio ya wawekezaji.

Tanzania yapewa changamoto kuhusu uongozi wa kisasa

Na Mwandishi wetu, Bagamoyo

Tanzania imepewa changamoto kufikiria namna ya kuandaa kada ya viongozi watakaokuwa na uwezo wa kuongoza kutokana na changamoto na mahitaji ya karne ya 21.

Mtaalamu wa kimataifa wa mambo ya uongozi, Bw. John Knights amewaambia waandishi wa habari jana kuwa huu ni wakati muhimu sana kwa Tanzania kutafakari, kama taifa, jinsi ya kuwa viongozi wa kisasa kwa ajili ya kizazi kijacho.

Mtaalamu huyo alikuwa akiongea wakati wa semina ya maswala ya uongozi mjini Bagamoyo, mkoa wa Pwani.

Semina hiyo ya siku mbili iliyoanza jana imeandaliwa na Taasisi ya Wakurugenzi Tanzania (IoDT) na inalenga kuwawezesha washiriki ambao ni viongozi katika taasisi mbalimbali mbinu mpya za uongozi.

Mtaalamu huyo alisema ni lazima viongozi wawe tayari kubadilika kwanza wao kutoka ndani ya mioyo yao badala ya kila mara kuwaambia watu nini cha kufanya.

Hivyo ndivyo mtu anaweza kuwa kiongozi bora,” alisema.

Mtaalamu hyo ambaye ni Mwenyekiti wa taasisi ya Leadershape ya nchini Marekani alisema katika kipindi cha miaka 20 iliyopita, dunia imebadilika kwa kiwango kikubwa hasa kutokana na matumizi ya mtandao wa intaneti na kurahisisha upatikanaji wa taarifa kwa kila mmoja.

Alisema, zamani kiongozi alichukuliwa kujua kila kitu na kuwaambia watu cha kufanya, hali ambayo amesema imebadilika kwa sasa.

Wakazi wa Dar es Salaam wakiangalia kwa makini gari aina ya Opah iliyogongwa na daladala na kujibamiza katika msitimu wa umeme, eneo la Tandika Devisi Kona leo majira ya saa moja asubuhi.

Wakazi wa Dar es Salaam wakishangaa gari aina ya Opah lililopata ajali baada ya kugongwa na basi la abiria (daladala) na kisha kwenda kujibamiza kwenye msitimu wa umeme, leo asubuhi katika eneo la Tandika Devisi Kona.