Wawekezaji wa Kimarekani waitembelea Tanzania

Na Mwandishi Wetu,Dar es Salaam

Tanzania imekuwa nchi ya kwanza barani Afrika kutembelewa na ujumbe maalumu wa wafanyabiashara kutoka nchini marekani wenye nia ya kuwekeza nchini, ikiwa ni matokeo ya mkutano wa kimataifa baina ya taifa hilo kubwa duniani na Afrika uliofanyika Agosti mwaka huu.

Ujumbe huo wenye wafanyabiashara 18 umejumuisha wamiliki wa makampuni na taasisi za kibiashara wanaokusudia kuwekeza katika nyanja mbalimbali . Katika mkutano baina ya wawekezaji hao na wadau wa uwekezaji uliofanyika jijini Dar es Salaam; ujumbe huo ulipokea ripoti kuhusu hali ya uwekezaji nchini.

Afisa uwekezaji mkuu kutoka Kituo cha uwekezaji nchini Brendan Maro alieleza hali hiyo akilenga juu ya sera ,fursa na changamoto zinazokabili sekta ya uwekezaji.

Katika taarifa hiyo alisema kuwa Marekani ina miradi 231 na imefanikiwa kutengeneza nafasi 50,927. Maro alitoa sababu kumi kwa nini Tanzania ni miongoni mwa maeneo muhimu ya uwekezaji tofauti na nchi nyingine. Akifafanua hilo alisema ni pamoja na utawala bora na fursa nyingi za uwekezaji ukilinganisha na nchi nyingine barani Afrika.