Tumieni fursa zilizopo kuondoa umaskini

Na mwandishi wetu, Kibaha

Mkuu wa mkoa wa Pwani,Mwantumu Mahiza amesema umaskini siyo sifa wala ulemavu,hivyo kila mwananchi anapaswa kutumia fursa ndogo anayoipata ili kuondokana na hali hiyo.

Akizungumza mjini hapa hivi karibuni, alisema endapo wananchi watatumia kwa umakini mpango wa kunusuru kaya maskini unaotekelezwa na mfuko wa Maendeleo ya Jamii (Tasaf),umaskini unaweza kuwa historia.

Alisema katika utekelezaji wa mpango huo, kuna haja ya kuangalia eneo jingine la wasusi ambao wakipewa mitaji na vikapu vitakavyokuwa mbadala wa mifuko ya plastiki inayochafua mazingira.Mahiza aliwataka watakaosimamia mpango huo kujizatiti kiutendaji na kuhakikisha kuwa malengo yake yanafanikiwa.

Pia alisisitiza kwamba uteuzi wa walengwa waliokusudiwa ufanyike kwa kufuata miongozo na taratibu zilizowekwa ikiwamo kushirikisha jamii bila upendeleo.

Awali,akizungumza kwa niaba ya mkurugenzi mtendeji wa Tasaf, Mkuu Kitengo cha mawasiliano wa mfuko huo, Zuhura Mdungi alisema mpango huo unatarajia kuzifikia kaya zaidi ya milioni moja zinazoishi katika hali ya umaskini.

Alisema utekelezaji wa kuziwezesha kaya maskini unahitaji uwekezaji mkubwa kwenye mifumo na kujenga uwezo katika ngazi zote.

“Tasaf imejikita katika uhaulishaji fedha kwa kaya maskini wakiwemo wazee , wajawazito na wanafunzi ili waweze kupata huduma za elimu na afya.Pia inatoa ajira kwenye kaya hizo hususan zeye watu wenye uwezo wa kufanya kazi,” alisema.

Alisema mpango huo wa kunusuru kaya maskini katika Halmashauri ya Mji wa Kibaha, unatarajia kufikia asilimia 70 ya kaya katika mitaa yote ya halmashauri.