Wajasiriamali Mbinga ni mfano wa kuigwa--BRELA

Msajili Msaidiza wa wakala wa usajili wa biashara na leseni (BRELA), Bw. Seka Kasera (kushoto) akimsikiliza mmoja wa wafanyabiashara wa halmashauri ya wilaya ya Mbinga mkoani Ruvuma, Bw. Mdaka Mdaka muda mfupi baada ya kukamilika kwa zoezi la usajili wa majina ya biashara kwa wakazi wa wilaya hiyo na vitongoji vyake mwishoni mwa wiki.  Zoezi hilo limeambatana na utoaji elimu juu ya umuhimu wa kusajili majina ya biashara na kazi zinazofanywa na wakala huo na limeanza mkoani Njombe wiki hii. 

Na Mwandishi Wetu, Mbinga

Wakala wa usajili wa Biashara na Leseni (BRELA) umesema mwamko ulioonyeshwa na na wakazi wa halmashauri ya wilaya ya Mbinga mkoani Ruvuma kusajili majina ya biashara zao unatakiwa kuigwa na wengine Tanzania.

“Wakazi wa Mbinga wameitikia vyema tangu siku ya kwanza tunaingia hapa,”alisema Msajili Msaidizi wa wakala huo, Bw. Seka Kasera wakati wa wiki ya elimu kwa umma kuhusu kazi za wakala katika mkoa wa Ruvuma mwishoni mwa wiki.

Kwa mujibu wa Bw. Seka, wengi wa waliojitokeza ni wajasiriamali wadogo na wakulima wa kahawa ambao kwa kiasi kikubwa wamekua na mwamko mkubwa wa kusajili biashara zao.

Mbali na elimu inayotolewa kwa wananchi kuhusu kazi za wakala, pia wafanyabiashara katika wilaya husika wanapewa fursa ya kusajili majina ya biashara zao kwa kutumia mfumo wa kielektroniki uliobuniwa hivi karibuni.

“Wakulima wamekua na mwamko mkubwa sana katika zoezi hili na wamekuja kwa wingi sana hapa Mbinga,”aliongeza Kasera.