Wananchi walalamika kuhujumiwa mradi wa DART

Na Mwandishi wetu, Dar es Salaam

Baadhi ya wananchi wameelezea kusikitishwa kwao na mwenendo wa uharibifu unaozidi kushika kasi katika miundombinu ya mradi wa mabasi yaendayo haraka (BRT).

Wakiongea kwa nyakati tofauti, wananchi hao wamesema uharibifu huo unaofanywa kwa makusudi ni uhujumu uchumi na haukubaliki.

“Hali hii haikubaliki…ni lazima serikali iingilie kati kuhakikisha uharibifu huu unakomeshwa mara moja,” alisema Juma Mohamed eneo la Magomeni Mapipa jana jijini Dar es Salaam.

Uharibifu huo kwa kiwango kikubwa unatokana na baadhi ya raia wasio waaminifu kuiba vifaa mbalimbali katika eneo la mradi huo kabla hata haujakabidhiwa rasmi.

Vifaa vinavyoibiwa na kuharibiwa ni pamoja na mifuniko ya mashimo ya mifumo ya maji, alama za barabarani, pamoja na kuharibiwa kwa kiwango kikubwa kwa nguzo katika maeneo ya vivuko ili kuiba nondo zake.

Vifaa hivi vinaibwa kwa nia ya kuviuza kama vyuma chakavu.

Mwananchi mwingine, Bi. Rose Nicodemus alisema vitendo hivyo vinatia doa nchi nzima.

“Ni lazima tubadilike kama jamii,” alisema.

Mkandarasi mkuu wa mradi huo unaofadhiliwa na Benki ya Dunia ni kampuni ya Strabag International ya Ujerumani.

Awali mradi huo ulipangwa kukabidhiwa mwisho mwa mwaka huu tayari kwa kuanza, lakini dalili ni kuwa hilo litachelewa kutokana uharibifu unaoendelea kutokea.

Naye mwananchi mwingine, Dr. Cecilia Revocatus aliiita hali hiyo kama ‘aibu kwa watanzania’ na kutoa wito kwa vyombo husika kuhakikisha mradi huo unakuwa na mafanikio hapa nchini na mfano kwa nchi jirani.

Hivi karibuni, Mkuu wa Mkoa wa Dar es Salaam, Bw. Said Mecky Sadick aliwaambia waandishi wa habari kuhusiana na taa za barabarani 28 zilizokwishaibiwa katika maeneo ya mradi huo na mifuniko ya chuma ya mifumo ya maji zaidi 10 iliyoibiwa.

“Tuliamua kupeleka mbele makabidhiano ya mradi huu baada ya kugundua kuwa uharibifu mkubwa ulikuwa umefanyika katika barabara hii mpya,” alisema.