Tanzania yaanza kuzalisha lami ya maji

Kaimu Mkurugenzi Msaidizi, Barabara Mijini na Vijijini toka Wizara ya Ujenzi, Mhandisi Hassan Matimbe (katikati) akikata utepe kuzindua rasmi mtambo wa kutengenezea lami ya maji jijini Dar es Salaam mwishoni mwa wiki.  Kushoto ni Mkurugenzi Mtendaji wa Starpeco Limited, Mhandisi Gratian Nshekanabo na Mwenyekiti wa kampuni hiyo, Bw. Prashant Patel (kulia).  Mtambo huo unamilikiwa na kuendeshwa na Starpeco Limited.

Mkurugenzi Mtendaji wa Starpeco Limited, Mhandisi Gratian Nshekanabo akifafanua jambo kwa Kaimu Mkurugenzi Msaidizi, Barabara Mijini na Vijijini toka Wizara ya Ujenzi, Mhandisi Hassan Matimbe (kushoto) wakati wa uzinduzi wa mtambo wa kutengenezea lami ya maji jijini Dar es Salaam mwishoni mwa wiki.  Kulia ni Mwenyekiti wa kampuni hiyo, Bw. Prashant Patel. Mtambo huo unamilikiwa na kuendeshwa na Starpeco Limited.

Na Mwandishi wetu, Dar es Salaam

Kwa mara ya kwanza kabisa, Tanzania imeanza kuzalisha lami ya maji.

Mtambo wa kuzalishia lami hiyo unaomilikiwa na kampuni ya Starpeco Limited ulizinduliwa mwishoni mwa wiki jijini Dar es Salaam.

Lami hiyo ambayo kwa kitaalamu inajulikana kama Bitumen emulsions inatumika san asana katika ujenzi wa barabara na kuziba viraka vya barabara zilizo haribika.

Mkurugenzi Mtendaji wa Starpeco Limited, Mhandisi Gratian Nshekanabo aliwaambia waandishi wa habari wakati wa uzinduzi huo kuwa upatikanaji rahisi na wa uhakika wa bidhaa hiyo utasaidia kwa kiwango kikubwa sekta ya ujenzi nchini.

“Teknolojia hii itabadilisha jinsi tunavyofanya kazi za ujenzi na ukarabati wa barabara zetu,” alisema.

Mkurugenzi huyo alisema kuwa kampuni hiyo inafuraha kwa kuweza kujenga na kumaliza mradi wa mtambo huo kwa viwango vinavyotakiwa.

“Mtambo huu umefuata viwango vya kimataifa,” alisema, na kuongeza kuwa una uwezo wa kuzalisha lita 10,000 za lami hiyo kwa saa.

Mtambo umetengenezwa Ukraine lakini vifaa vyake vingine vimetoka Italia na Ufaransa.

Mhandisi Nshekanabo amesema mtambo huo utatengeneza ajira za moja kwa moja 25 na 100 zisizo za moja kwa moja.

Kwa upande wake, Kaimu Mkurugenzi Msaidizi, Barabara Mijini na Vijijini toka Wizara ya Ujenzi, Mhandisi Hassan Matimbe alitoa pongezi kwa kampuni hiyo kwa uamuzi wa kuanzisha mtambo huo.

Afisa Masoko Mkuu wa kampuni hiyo, Bw. Jones Mkoka alisema mtambo huo unaendana na nia ya Tanzania kubadili hali ya uchumi kufikia uchumi wa kati.

“Maendeleo ya viwanda ni moja ya njia za kufikia lengo hilo,” alisema.

Alifafanua kuwa kampuni hiyo imeamua kuanza kutengeneza lami hiyo ya maji hapa nchini ili badala ya kuagiza nje ye nchi.

Kampuni hiyo pia inatarajia kuuza lami hiyo nje hasa katika nchi za Maziwa Makuu ambapo haizalishwi kwa kiwango cha kutosha.

“Kwa kutumia lami hii, serikali itaweza kuokoa gharama za ujenzi wa barabara,”alisema Afisa huyo.

Kwa mujibu wa wataalamu, lami hiyo ya maji ndio yenye unafuu zaidi kulinganisha na lami aina nyingine na pia rafiki kwa mazingira.