Watafiti washauri kuwepo sheria, kanuni kuongoza Kilimo cha mkataba

Naibu Makamu Mkuu wa Chuo Kikuu Mzumbe, Taaluma, Profesa Josephat Itika (kushoto) akifafanua jambo wakati wa kongamano la watafiti waliokuwa wakijadili kuhusu kilimo cha mkataba mwishoni mwa wiki jijini Dar es Salaam.  Katikati ni Naibu Makamu Mkuu wa Chuo Kikuu Mzumbe, Utawala na Fedha, Prof. Faustin Kamuzora na Mwenyekiti wa Baraza la Chuo hicho, Prof. Daniel Mkude.

Makamu Mkuu wa Chuo Kikuu Mzumbe, Profesa Joseph Kuzilwa (kushoto) akifafanua jambo wakati wa kongamano la watafiti waliokuwa wakijadili kuhusu kilimo cha mkataba mwishoni mwa wiki jijini Dar es Salaam.  Katikati ni mhadhiri wa Chuo Kikuu cha Minnesota Marekani, Profesa Mark Sellemare na kulia ni Mkurugenzi wa Kitengo cha Jiografia na Jiolojia toka chuo kikuu cha Copenhagen, Denmark, Profesa Niels Fold.

Na Mwandishi wetu, Dar es Salaam

Serikali imeshauriwa kuharakisha kutunga sheria na kanuni zitakazosaidia kuongoza Kilimo cha mkataba ili wakulima wadogo waweze kunufaika zaidi kutokana na shughuli za Kilimo.

Makamu Mkuu wa Chuo Kikuu Mzumbe, Profesa Joseph Kuzilwa alitoa ushauri huo hivi karibuni jijini Dar es Salaam katika warsha iliyokuwa ikijadili matokeo ya mradi wa utafiti kuhusu kilimo cha mkataba uliyofanywa na chuo hicho kwa kushirikiana na Chuo cha Mipango Dodoma na Chuo Kikuu cha Copenhagen cha Denmark.

“Tunahitaji kuwa na sheria itakayolenga kuwasaidia wakulima wadogo,”alisema.

Kilimo cha mkataba kinahusisha makubaliano kati ya wakulima wakubwa na wakulima wadogo kwa kuwasaidia maarifa, teknolojia na kununua mazao yao.

Alisema sheria hiyo inatakiwa kulenga kuleta suluhisho kwa matatizo yanayowakumba wakulima wadogo ambao hawafaidiki vya kutosha hasa katika mazao ya pamba, miwa na alizeti.

Akifafanua zaidi alisema kutokana na kutokuwepo kwa sheria hiyo, mikataba kati ya wakulima hao na wakulima wakubwa wawekezaji huwanyima fursa ya kuendelea.

“Tumefarijika kwamba serikali ipo mbioni kutunga sheria mama ili kuona pande zote za Kilimo cha mkataba zinapata haki inayostahili,” alisema.

Katika warsha hiyo watafiti waliwasilisha makala 25 za tafiti juu ya Kilimo cha mkataba na kuonyesha faida na changamoto za Kilimo hicho.

Ilikubaliwa katika warsha hiyo kuanzishwa kwa mtandao wa watafiti kwa nchi za Afrika watakaokuwa wanashauriana na kubadilishana uzoefu kuhusiana na maswala mbalimbali kuhusu kilimo cha mkataba.