Kigogo mwingine dawa za kulevya anaswa Dar

Dar es Salaam

Sakata la vigogo wa dawa za kulevya limezidi kuwaibua watuhumiwa baada ya kigogo mwingine aliyekuwa akisakwa tangu mwaka 2012, kukamatwa katika Uwanja wa Ndege wa Kimataifa wa Julias Nyerere(JNIA), Dar es Salaam.

Hatua hiyo imetokana na kunaswa kwa watuhumiwa, ambao ni vinara wa kusafirisha na kuingiza dawa za kulevya nchini.

Kigogo huyo aliyekamatwa juzi saa 3.00 asubuhi ni Christine Kighahe, aliyewasili nchini kupitia katika uwanja huo akitokea Thailand kwa kutumia ndege ya Shirika la Ndege la Kenya.

Christine, anadaiwa kuwa ni kigogo wa biashara hiyo, akiwatumia wanawake katika uuzaji na usambazaji wa dawa hizo nchini na katika miji ya Hong Kong na Guangzong.

Akizungumza Kamanda wa Kikosi cha Kuzuia Dawa za Kulevya, Godfrey Nzowa, alisema mwanamke huyo alikuwa akitafutwa kwa muda mrefu bila ya mafanikio.

Alisema Christine alikamatwa baada ya kuwekwa ulinzi mkali katika maeneo mbalimbali nchini na kikosi kazi cha kupambana na dawa za kuleya.

Kamanda Nzowa alisema baada ya upelelezi kukamilika, mwanamke huyo atafikishwa mahakamani na kuunganishwa na vigogo wengine wa biashara hiyo haramu.