TNBC mbioni kuzindua Baraza la Biashara Simiyu

Na Mwandishi wetu, Geita

Baraza la Taifa la Biashara (TNBC) linatarajia kuzindua baraza la biashara la Mkoa wa Simiyu hivi karibuni na kufanya mikoa yote kuwa na mabaraza hayo yenye jukumu la kuhamasisha uwekezaji na biashara katika mikoa husika.

Katibu Mtendaji wa Baraza hilo, Bw. Raymond Mbilinyi amewaambia waandishi wa habari Mkoani Geita hivi karibuni kuwa taratibu za kuzinduliwa kwa baraza katika mkoa huo zimefikia pazuri.

“Tumebaki na mkoa mmoja wa Simiyu katika kuhakikisha mabaraza yote nchini yanafanya kazi,”alisema wakati wa uzinduzi wa baraza la biashara la mkoa wa Geita.

Alifafanua kuwa serikali imejiwekea mkakati wa kuhakikisha mwaka 2025 nchi inafikia uchumi wa kati ambao pia utawaletea maisha bora zaidi watanzania.

Alisistiza kuwa mabaraza ya biashara ya mikoa yanawajibu wa kuwa kichocheo cha sekta binafsi kuimarika zaidi na inachangia ukuaji wa uchumi.

Mabaraza ya biashara ya mkoa yanaundwa na wadau toka sekta ya umma na binafsi na yanafanya kwa kusimamiwa na TNBC.

Katibu Tawala wa Mkoa wa Geita, Bw. Severine Kahitwa alihamasisha wawekezaji kwenda katika mikoa mipya iliyoanzishwa.

Geita na Simiyu ni kati ya mikoa mipya kuanzishwa na serikali Tanzania bara.