Strabag yatangaza mabadiliko makutano ya Morogoro/Kawawa kuanzia leo

Na Mwandishi wetu, Dar es Salaam

Mkandarasi mkuu wa ujenzi wa barabara ya mabasi yaendayo haraka (BRT), Strabag International ametangaza mabadiliko ya matumizi katika makutano ya barabara za Morogoro na Kawawa.

Mabadiliko hayo yanaanza leo tarehe 10 hadi tarehe 25 mwezi huu.

Akitangaza mabadiliko hayo jana jijini Dar es Salaam, Afisa uhusiano wa kampuni hiyo, Bw. Yahya Mkumba alisema mabadiliko hayo yanatokana na matengenezo yatakayokuwa yanafanyika eneo hilo.

Akielezea zaidi, alisema magari yatakayokuwa yanatumia barabara ya Kawawa kuelekea maeneo ya Kigogo na Msimbazi hayataweza kuendelea moja kwa moja yatakapofika katika makutano hayo na badala yake yatalazimika kuchepuka kushoto, katika barabara ya Morogoro na kutafuta njia mbadala.

Pia magari yatakayokuwa yanatokea eneo la kinondoni kwa kutumia njia ya Kawawa hayataweza kuelekea Ubungo yatakapofika katika taa za kuongozea magari za Magomeni.

Aidha, magari yatakayokuwa yanatokea eneo la Jangwani kwa kutumia barabara ya Morogoro hayataruhusiwa kuelekea Kinondoni yatakapofika katika makutano ya barabara hizo.

“Wananchi watuvumilie katika kipindi hiki na tunaomba radhi kwa usumbufu wowote utakaotokea,” alisema.

Mradi wa BRT unalenga kupunguza msongamano wa magari jijini Dar es Salaam.