Tanzania kuzidi kufaidika na Lions Clubs

Meneja Msaidizi wa Lions Clubs International, Bw. Benjamin Futransky (kulia) akiwa na Mratibu mkuu wa surua-rubella wa klabu hiyo nchini, Bw. Abdul Majeed Khan wakati wa moja ya shughuli za kuhamasisha wananchi kujitokeza kupata chanjo ya magonjwa hayo hivi karibuni jijini Dar es Salaam.

Na Mwandishi wetu, Dar es Salaam

Klabu ya Lions International na wadau wengine wanatarajia kukusanya jumla ya dola milioni 60 za Marekani ifikapo mwaka 2017 ili kuimarisha kampeni ya chanjo ya surua na rubella barani Afrika, Tanzania ikiwa moja ya nchi zitakazofaidika.

Akizungumza na waandishi wa habari hivi karibuni jijini Dar es Salaam, Meneja Msaidizi wa kablu hiyo, Bw. Benjamin Futransky alisema fedha hizo zitapatikana kutoka kwa wanachama zaidi ya milioni moja waliopo duniani kote kwa madhumuni ya kutoa huduma za afya hasa chanjo hiyo.

“Ni matarijio yetu kwamba fedha hizi zitapatikana na kwamba zitatumika katika kuimarisha kampeni hii,” alisema.

Kampeni ya surua-rubella hufanyika hapa nchini kila baada ya miaka mitatu.

Katika kampeni ya mwaka huu klabu ya Lions imetoa msaada wa Dola za kimarekani milioni 12 (sawa na Tshs 20 bilioni) ili kufanikisha zoezi hilo. Kampeni ya mwaka huu ilizinduliwa tarehe 18 mwezi huu na kilele chake kitafikiwa leo tarehe 24 mwezi huu.

Kwa mujibu wa Meneja huyo, fedha hizo zitapatikana kwa ushirikiano wa Klabu ya Lions International na Gavi Alliance ambapo zaidi ya dola milioni 60 za Marekani zitakusanywa kwa lengo la kuendeleza kampeni ya chanjo ya surua-rubella katika nchini mbalimbali za Afrika ikiwemo Tanzania.

Akizungumzia maendeleo ya kampeni inayoendelea, alisema anaridhishwa na mwitikio wa watu katika kuwapeleka watoto kupata chanjo na akatoa wito kwa wananchi kuzidi kufika katika vituo vya tiba ili wapate chanjo.