Gharama za kitanda Muhimbili zapanda

Na Mwandishi wetu, Dar es salaam

Hospitali ya Taifa ya Muhimbili imepandisha gharama za huduma hospitalini hapo na sasa mgonjwa atakayelazwa atalazimika kulipia Sh.5000 kwa siku.

Gharama hizo zitalipwa kwa wagonjwa wote wa rufaa, ilisema taarifa iliyosainiwa na Mkurugenzi mtendaji wa hospitali hiyo,Dk. Marina Njelekela na kusambazwa kwenye vyombo vya habari.

Taarifa hiyo ilibainisha kuwa gharama mpya zilianza kutumika Oktoba 17, mwaka huu. Hata hivyo, taarifa hiyo haikufafanua uamuzi wa kupandisha gharama hizo.

Alipofuatwa ili kutolea ufafanuzi mabadiliko hayo, Ofisa Uhusiano wa MNH, Aminiel Algaesh hakuwa tayari kusema lolote , huku Dk. Njelekela naye akishindwa kupatikana.

Kwa upande wake Naibu Waziri wa Afya, Dk Steven Kebwe alisema hafamu lolote juu ya ongezeko la bei hizo.

“Sifahamu kuwapo na mabadiliko ya bei za matibabu, ninachojua mimi gharama bado ziko chini,”alisema Kebwe.

Muuguzi wa hostipitali hiyo ambaye hakutaka jina lake litajwe alisema gharama hizo zinahusisha malipo ya malazi ya shilingi 5000 kwa siku na chakula shilingi 2000 kwa mlo mmoja, gharama ambazo anasema hazikuwapo siku za nyuma.

Awali, wagonjwa walikuwa wanalipa gharama za matibabu tu, huduma nyingine za malazi na chakula zilitolewa bure. Mabadiliko hayo sasa yatamlazimu mgonjwa aliyepewa rufaa kulipia gharama hizo bila kujali alikotoka.

Muuguzi huyo alisema idadi ya wagonjwa imepungua wodini kutokana na wengi wao kushindwa kumudu gharama.

Amesema tangu utaratibu huo uanze, kumekuwa na tofauti kubwa na zamani kwasababu wagonjwa ambao hawana uwezo wa kulipia kiasi hicho, hawalali hospitali hata kama hali zao zingewataka kulazwa.