Wateja Benki ya Africa Tanzania wafaidika na droo

Mkuu wa Hazina wa Benki ya Afrika Tanzania, Bw. Bruno Ngooh (katikati) akichezesha droo ya Kwanza ya mwezi ya kampeni ya ‘Weka na Ushinde’ inayoendeshwa na benki hiyo jana jijini Dar es Salaam.  Washindi watano walipatikana miongoni mwa 551 walioshiriki na kupatiwa zawadi mbalimbali.  Kulia ni Mkuu wa tawi la benki hiyo la Msimbazi, Kariakoo, Bw. Emmanuel Mwaya na kushoto ni ofisa kutoka Bodi ya Michezo ya Kubahatisha, Bw. Majid Bakari.

Meneja Mwandamizi wa Masoko na Mawasiliano wa Benki ya Afrika Tanzania, Bw. Solomon Haule (aliyesimama) akielezea jambo wakati wa droo ya Kwanza ya mwezi ya kampeni ya ‘Weka na Ushinde’ inayoendeshwa na benki hiyo jana jijini Dar es Salaam. Wa pili kutoka kushoto ni Mkuu wa Hazina wa benki hiyo, Bw. Bruno Ngooh; ofisa kutoka Bodi ya Michezo ya Kubahatisha, Bw. Majid Bakari na Meneja Mwandamizi wa tawi la benki hiyo la Msimbazi, Kariakoo, Bw. Emmanuel Mwaya (wa pili kulia).

Na Mwandishi wetu, Dar es Salaam

Wateja watano wa Benki ya Afrika Tanzania wameibuka na ushindi wa zawadi mbalimbali baada ya kushiriki shindano la droo ya Kwanza ya mwezi ya Weka na Ushinde zaidi inayoendeshwa na benki hiyo.

Kampeni ya benki hiyo ya ‘Weka na Ushinde’ ilianza mwezi wa Tisa na inatarajiwa kuisha mwezi wa Kumi na Moja mwaka huu.

Droo hiyo ilichezeshwa na Mkuu wa Hazina wa Benki hiyo, Bw. Bruno Ngooh katika tawi la Msimbazi Kariakoo ambapo washindi hao walishinda baada ya kuongeza fedha au amana katika akaunti zao na kupata sifa za kuingia katika droo hiyo.

“Droo hii ni ya kwanza ya Mwezi ambapo mteja anatakiwa kuweka fedha katika akaunti yake zaidi ya Tsh. milioni 2 ili aweze kuwa na sifa ya kushiriki,”alisema.

Alisema katika droo hiyo wateja 551 waliingia katika shindano hilo na watano wakaibuka washindi na kujinyakulia zawadi mbalimbali.

Mshindi wa kwaza katika droo hiyo ni, Leakey Gathari aliyepata zawadi ya pikipiki; John Raphael, Simu ya Mkononi aina ya Samsung Tablet; Ibrahim Agwanda simu aina ya Smart Phone; Mary Mushi, Tshs 500,000 na Innocent Msigwa, Vocha ya Tsh. 100,000 ya kununulia vitu kwenye duka kubwa (super market).