Wafanyabiashara Songea waisifu BRELA

Afisa Leseni za Viwanda kutoka Wakala wa Usajili wa Biashara na Leseni (BRELA) Bw. Yusuph Nakapala (kulia) akitoa maelekezo kwa mmoja wa wajasiriamali,  Iddi Ambangile Mwakibuka (katikati) alipotembelea eneo la viwanda vidogo (SIDO) katika halmashauri ya  manispaa ya Songea mkoani Ruvuma mwishoni mwa wiki kuangalia na kutoa elimu juu ya umuhimu wa kusajili majina ya biashara zao.  Kushoto ni Afisa Biashara kutoka katika osifi ya mkuu wa mkoa wa Ruvuma, Furaha Mwangakala.

Afisa Mifumo wa Wakala wa Usajili wa Biashara na Leseni (BRELA), Fransis Mwakalebela (kushoto) akitoa maelezo kwa baadhi ya wafanyabiashara wa manispaa ya Songea mkoani Ruvuma mwishoni mwa wiki wakati wa zoezi la kusajili majina ya biashara zao ili ziweze kurasimishwa na kutambulika.  Zoezi hilo limefanyika kwa siku tatu katika manispaa hiyo.

Na Mwandishi Wetu, Songea

Wafanyabiashara katika Manispaa ya Songea mkoani Ruvuma wamejitokeza kwa wingi katika zoezi la usajili wa majina ya biashara zao  na kuielezea fursa hiyo kuwa mkombozi kwao.

Wakala wa Usajili wa Biashara na Leseni (BRELA) uko mkoani Ruvuma ukiendesha elimu kuhusu kazi zao pamoja na kutoa fursa kwa wakazi wa mkoa huo kusajili jina la biashara kwa kutumia mfumo mpya wa kielektroniki ulioanza kutumiwa na wakala hivi karibuni.

Wakizungumza kwa nyakati tofauti, wafanyabiashara Emmanuel Kondoe, Deogratius Banda na Tatu Songambele wameonekana kuguswa na zoezi hilo na kulielezea kuwa ni moja ya kichocheo kikubwa katika kuendeleza na kuimarisha biashara zao.

“Suala la kusajili jina la biashara ni jambo la msingi ambalo linatusaidia sisi wafanyabiashara wadogo na wa kati katika kuendeleza na kukuza mitaji,” alisema Kondoe.

Aliongeza kuwa walikuwa wanatumia muda mwingi kwenda Dar es Salaam kusajili jina, jambo ambalo lilikua linawagharimu muda pamoja na fedha nyingi.

“Nimesajili jina kwa shilingi elfu sita tu, ningeenda Dar es Salaam ningetumia zaidi ya laki 2 kwa usafiri, kula pamoja na kulala,” aliongeza Kondoe.

Tatu Songambele aliielezea hatua ya BRELA kutembelea wafanyabiashara mikoani ya kibunifu na mkombozi kwa wafanyabiashara wadogo.

“Wamefanya jambo kubwa sana kwetu wana Ruvuma…nimefurahishwa nao,” alisema Bi. Songambele.