Kamati ya Bunge TAMISEMI yataka kikosi kulinda miundombinu DART

Mtendaji Mkuu wa Wakala wa DART, Bi, Asteria Mlambo akielezea jambo wakati wa mkutano na wajumbe wa Kamati ya Bunge ya Tawala za Mikoa na Serikali za Mitaa (TAMISEMI) na maafisa wengine wa serikali jana jijini Dar es Salaam.  Wengine kutoka kushoto ni Manaibu Waziri, Ofisi ya Waziri mkuu,TAMISEMI, Bw. Aggrey Mwanri na Bw. Kassim Majaliwa pamoja na Naibu Katibu Mkuu wa Wizara hiyo, Dk. Deo Mtasiwa (wa tatu kushoto).  Mkutano huo ulizungumzia maswala mbalimbali ya mradi unaoendelea wa Mabasi Yaendayo Haraka (BRT).

Mwenyekiti wa Kamati ya Bunge ya Tawala za Mikoa na Serikali za Mitaa (TAMISEMI), Dk. Hamis Kigwangala akisisitiza jambo katika mkutano kati ya kamati yake na wakala wa DART uliozungumzia kuhusu maswala mbalimbali ya mradi unaoendelea wa Mabasi Yaendayo Haraka (BRT) jana jijini Dar es Salaam.  Wengine ni Naibu wake, Bw. John Lwanji (kulia) na Katibu wa Kamati hiyo, Bw. Yona Kirumbi (kulia).

Na Mwandishi wetu, Dar es Salaam

Kamati ya Bunge ya Tawala za Mikoa na Serikali za Mitaa (TAMISEMI) imetoa agizo kwa Wakala wa Mradi wa Mabasi Yaendayo Haraka (DART) kuharakisha kufanya makubaliano na Jeshi la Polisi nchini ili kuunda kikosi maalumu cha ulinzi wa miundombinu ya mradi huo ambayo imekuwa ikihujumiwa na baadhi ya watu.

Mwenyekiti wa Kamati hiyo, Bw. Hamis Kigwangala amesema jijini Dar es Salaam jana kuwa kikosi hicho ni muhimu ili kusaidia kulinda miundombinu ya mfuno huo wa mabasi ambayo umeghalimu fedha nyingi.

“Tungependa mfumo huu wa mabasi uwe na kikosi maalumu cha ulinzi ili miundombinu yake isiendelee kuhujumiwa kama ilivyo sasa,”alisema baada ya kikao kati ya kamati hiyo na uongozi wa wakala wa DART.

Alisema kuwepo kwa kikosi cha ulinzi kutasaidia kwa kiasi kikubwa kulinda miundombinu hiyo na wale watakaobainika wanahujumu basi sheria iweze kushika mkondo wake.

Alisema mradi huo umetumia gharama kubwa kuujenga hivyo ni vyema kila mkazi wa jiji la Dar es Salaam kuchukua jukumu la kuwa mlinzi dhidi ya wahujumu wa miundombinu hiyo.

Pia alishauri serikali kuzijengea uwezo kampuni za kizalendo  katika sekta ya usafirishaji ili ziweze kushiriki katika mfumo huo kwa kushirikiana na kampuni za kigeni au zenyewe.

Naibu Waziri, Ofisi ya Waziri mkuu,TAMISEMI, Bw. Aggrey Mwanri alisema mradi huo kwa sasa unaelekea katika hatua nzuri na wakazi wa Dar es Salaama watarajie huduma nzuri ya usafiri.

RC awaonya watendaji TASAF III

Morogoro

MKUU wa mkoa wa Morogoro Joel Bendera, amewaonya watendaji wanaoshiriki utekalazaji wa Mpango wa Maendeleo ya Jamii (Tasaf) awamu ya tatu wa kunusuru kaya masikini kuhakikisha wanachagua walengwa lasivyo watachukuliwa hatua kali.

Bendera alitoa onyo hilo wakati akizindua mpango huo katika Manispaa ya Morogogoro na Halimashauri ya Wilaya ya Morogoro kwa nyakati tofauti mjini hapa.

Alisema mpango huo umekuja kwa ajili ya kusaidia watu masikini hivyo watendaji wanatakiwa wasirejee makosa yaliyokwishafanywa na watendaji katika awamu ya kwanza na ya pili kwa maslahi yao kisiasa.

Alisema mpango huo unakusudia kusaidia kaya masikini baada ya kufanyiwa majaribio katika baadhi ya wilaya  nchini

Kwa upande wake Mkuu wa Wilaya ya Mvomero Antony Mtaka alisema endapo watendaji hao watafanikisha watasaidia kurudisha imani za wananchi kwa viongozi wao.

Naye Kaimu Mkurugenzi Mkuu wa Tasaf, Farij Mshee alisema mpango huo unatarajia kusaidia watu milioni 6.5 kwa kuwaondolea umasikini.

Tanesco yakata umeme bila taarifa

Dar es Salaam

Tatizo la kukatika kwa umeme limekuwa kero kwa maeneo mbalimbali ya nchi na lawama nyingi zimekuwa zikielekezwa kwa shirika la Umeme Tanzania (TANESCO).

Maeneo mengi yamekumbwa na kero hiyo tangu wiki iliyopita mpaka jana huku wahusika wakishindwa kutoa taarifa ya nini kinachosababisha kero hiyo ya kukatika kwa umeme.

Hali hiyo imesababisha adha hata katika vikao vya kamati za Bunge vinavyoendelea kwenye Ukumbi wa Karimjee, iliyosababisha Wajumbe wa kamati kushindwa kuendelea na shughuli zao .

Wajumbe wa kamati hizo walionekana kuangaika na wengine kufungua madirisha na milango ili kupata hewa,baadhi wakitoka nje mara kwa mara na wengine wakitumia makabrasha yao kujipepea kutokana na joto kali.

Makamu Mwenyekiti wa Kamati ya Fedha ya Bunge (PAC), Deo Filikunjombe aliyekuwa akiongoza kikao, ilibidi amwombe radhi Mwenyekiti wa Baraza la Chuo Kikuu cha Kilimo Sokoine (SUA), Philemon Luhanjo kutokana na kuchelewa kuanza kwa kikao kulikosababishwa na kukatika kwa umeme.

“Pole sana mzee nimekuona umewahi kweli lakini shughuli zetu hapa zimekwamishwa na umeme, kwa utaratibu ulivyo ni lazima majadiliano yaanendelea kwenye vikao vyetu yakirekodiwa kwa ajili ya kumbukumbu.