Wamiliki wa viwanda Mbeya wahamasishwa kujisajili BRELA

Maofisa kutoka Wakala wa Usajili wa Biashara na Leseni (BRELA), Bw. Geofrey Kobelo na Bi. Loy Mhando wakiongea na mmoja wa wafanyabiashara mjini Mbeya hivi karibuni.  BRELA inaendesha mafunzo kwa wakazi wa mkoa wa Mbeya kuhusiana na kazi wanazofanya na jinsi wafanyabiashara wanavyoweza kufaidika na huduma zao.

Msajili Msaidizi wa Makampuni kutoka Wakala wa Usajili wa Biashara na Leseni (BRELA), Bi. Rehema Kitambi (aliyesimama) akiongea na mmoja wa wafanyabiashara mjini Mbeya hivi karibuni.  BRELA inaendesha mafunzo kwa wakazi wa mkoa wa Mbeya kuhusiana na kazi wanazofanya na jinsi wafanyabiashara wanavyoweza kufaidika na huduma zao.

 Na Mwandishi wetu, Mbeya

Wajasiriamali wenye viwanda vidogo, vya kati na vikubwa mjini Mbeya wametakiwa kuhakikisha viwanda vyao vimesajiliwa na kupata leseni za uendeshaji, kwani kwa kutofanya hivyo ni kinyume cha sheria za nchi.

Rai hiyo ilitolewa mjini humo hivi karibuni na Afisa Leseni za Viwanda kutoka Wakala wa Usajili wa Biashara na Leseni (BRELA) Bw. Yusuph Nakapala wakati maofisa wa Wakala huo walipowatembelea wajasiriamali katika maeneo yao ya biashara hivi karibuni mjini Mbeya.

Bw. Nakapala alisema sheria za nchi zinamtaka kila mwenye kiwanda kupata leseni ya uendeshaji kitu ambacho kitasaidia serikali kupata taarifa sahihi za viwanda ambazo zitasaidia kupanga mipango na sera za nchi.

Alifafanua pia kuwa faida za kuwa na leseni ni kurasimisha biashara na kuifanya itambulike zaidi na jamii na taasisi mbalimbali.

“Ukipata leseni ya kiwanda ina maana tayari biashara yako iko rasmi na inatambulika, na sisi kama serikali tunakutambua kwa biashara unayoifanya na upo wapi,” alisema.

BRELA inaendesha mafunzo kwa wakazi wa mkoa wa Mbeya kuhusiana na kazi wanazofanya na jinsi wafanyabiashara wanavyoweza kufaidika na huduma zao.

Nao baadhi ya wafanyabiashara wenye viwanda vidogo mkoani humo waliwashukuru maofisa hao kutoka BRELA kwa kuwatembelea na kutoa wito kwa wajasiriamali wenzao ambao hawajapata leseni kufanya hivyo.

Mmoja wa wajasiriamali hao, Bw. Damas Maghembe alisema yeye tayari ana leseni ya kiwanda katika biashara ya sabuni anayoifanya na amepata faida nyingi kutokana na bidhaaa yake kujulikana sehemu kubwa ya mkoa huo.

“Ukirasimisha biashara yako, unakuwa na mtandao mkubwa na watu wengine ambao wako mbali…ni rahisi kuendelea,” alisema.

Alitoa wito kwa wafanyabiashara ambao bado hawajasajili biashara na viwanda vyao kufanya hivyo kwani kwa kutofanya hivyo kunaikosesha serikali mapato.

Kwa upande wake, Msajili Msaidizi Mwandamizi wa Makampuni kutoka BRELA, Bi. Rehema Kitambi alisema waliamua kwenda watembelea wafanyabiashara katika maeneo yao ya biashara, ili kupeleka elimu ya umuhimu wa kusajili bidhaa zao kutokana na baadhi yao kukosa muda wa kushiriki semina ya mafunzo zilizokuwa zikitolewa.

“Wengi wamekuwa wakipiga simu kuwa watakuja kwenye semina lakini hawafiki, kwa hiyo tukaona ni bora tuwafuate huku huku,” alisema.

Bi. Kitambi aliongeza kuwa mpaka sasa tathmin inaonyesha kuwa           elimu waliyopata wajasiriamali na wafanyabiashara wa mkoani humo imewasaidia kutokana na muitikio mkubwa wa wafanyabiashara waliojitokeza kusajili biashara zao.

“Mpaka sasa tumesajili takribani majina ya biashara zaidi ya 100 kwa wilaya ya Mbeya mjini na Uyole,” alisema.  Wilaya nyingine zitakazotembelewa ni pamoja na Mbalizi na Tunduma..

BRELA ipo katika mchakato  wa kuanza kutumia mfumo wa kielektroniki wa kusajili majina ya biashara popote nchini na nje ya nchi kwa kutumia mtandao.

Mwisho