BRELA yahamasisha wakazi Mbeya kuhudhuria wiki ya elimu

Na Mwandishi wetu, Dar es Salaam

Wakazi wa Mbeya na vitongoji vyake wamehamasishwa kujitokeza kwa wingi kufahamu kazi za Wakala wa Usajili wa Biashara na Leseni (BRELA) katika wiki ya uhamasishaji itakayoendeshwa na wakala huo kuanzia leo.

Akitangaza tukio hilo la uhamasishaji kwa waandishi wa habari mwishoni mwa wiki jijini Dar es Salaam, Afisa Mtendaji Mkuu wa BRELA na Msajili wa Makampuni, Bw. Frank Kanyusi Frank alisema wameamua kufanya hivyo kwa kuwa wananchi wengi hawafahamu kazi za wakala na jinsi wanavyoweza kufaidika.

“Tumegundua watu wengi hawafahamu BRELA inafanya nini hasa na jinsi gani wanaweza kufaidika na wakala huu,” alisema.

Alisema hii ni nafasi muhimu kwa wakazi wa Mbeya na vitongoji vyake na hivyo kuwataka kujitokeza kwa wingi kufaidika na elimu watakayokuwa wanatoa.

“Tumeanza na Mbeya…mikoa mingine itafuata,” alisema.

Pamoja na elimu hiyo, pia wakazi wa Mbeya watafaidika na usajili wa papo kwa hapo wa jina la biashara utakaokuwa unafanywa na BRELA kwa kutumia mfumo mpya wa kielektroniki ulioanza kutumiwa na wakala hivi karibuni.

“Wakazi wa Mbeya watumie nafasi hii pia kusajili majina ya biashara papo kwa hapo kwa kutumia teknolojia ya kisasa kabisa,” alisema.

Wataalamu wa Teknolojia ya Habari na Mawasiliano (TEHAMA) wa BRELA wamebuni mfumo ambao utawawezesha watu kusajili jina la biashara kwa urahisi na ufanisi zaidi kuliko ilivyokuwa ikifanyika hapo nyuma.

Kwa mujibu wa afisa huyo mfumo huo uliobuniwa mwezi wa Sita mwaka huu umeonyesha kuwa na ufanisi mkubwa na wa manufaa.

“Watu wanaosajili jina la biashara wameongezeka mara dufu na malalamiko yamepungua kwa kiwango kikubwa,” alisema.

Akizungumzia faida za mfumo huo mpya, alisema utawawezesha watu wengi zaidi kuwa na majina rasmi ya biashara na hivyo kufahamika zaidi na vyombo vya fedha na kuweza kupata mikopo.

Pia alisema mfumo huo utaiwezesha serikali kufahamu watu waliosajiliwa kisheria na hivyo kurahisisha swala zima la ukusanyaji kodi.    

Wiki hiyo ya uhamasishaji inaendeshwa hadi tarehe 29 mwezi huu.

Urahisi wa usajili wa jina la biashara ni kiashiria muhimu wa mazingira ya biashara katika nchini.

Tanzania inafanya juhudi kubwa kuhakikisha kuwa inaimarisha mazingira yake ya kufanya biashara ili kuvutia zaidi wawekezaji wa ndani na nje ya nchi.

Mwisho