CCM Dar yafurahishwa na mradi wa mabasi yaendayo haraka

Mkuu wa Mkoa wa Dar es Salaam, Bw. Said Meck Sadick ( kushoto) na Mwenyekiti wa CCM  Mkoa wa Dar es Salaam,Bw. Ramadhan Madabida (kulia) wakipewa maelezo ya hatua za utekelezaji wa Mradi wa Mabasi yaendayo Haraka kutoka kwa  Mtendaji Mkuu wa DART,Bi. Asteria Mlambo (katikati)  wakati wa ziara ya  Wajumbe wa Halmashauri Kuu ya CCM Mkoa, walipofanya ziara na  kukagua miundombinu ya mradi huo barabara ya Morogoro jijini mwishoni mwa wiki. ( wa pili kutoka kulia) Meneja wa Mradi wa kutoka Wakala wa Barabara nchini(TANROADS) mhandisi Barakaeli Mmari.

Mtendaji Mkuu wa Wakala wa Mradi wa Mabasi yaendayo Haraka ( DART) Bi. Asteria Mlambo (kushoto) akitoa maelezo kwa Mwenyekiti wa CCM Mkoa wa Dar es Salaam,Bi. Ramadhan Madabida (katikati)  wakati wa ziara ya  wajumbe wa Halmashauri Kuu ya chama hicho mkoa, walitembelea na kukagua  mradi wa mabasi yaendayo haraka barabara ya Morogoro, ( kulia) ni Mkuu wa mkoa wa Dar es Salaam, Said Meck Sadick mwishoni mwa wiki.

Na Mwandishi Wetu, Dar es Salaam

Wajumbe wa Halmashauri kuu ya Chama Cha Mapinduzi (CCM) mkoa wa Dar es Salaam, wameelezea kuridhishwa na hatua kubwa iliyofikiwa katika utekelezaji wa mradi wa mabasi yaendayo haraka (BRT).

Mradi huo uko chini ya wakala wa mradi wa mabasi yaendayo haraka (DART).

Wajumbe hao walikuwa katika ziara ya kutembelea miradi mbalimbali yamaendeleo inayotekelezwa na serikali katika mkoa huo hivi karibuni.

“Tumeridhishwa sana…mradi unaotekelezwa na DART ni mradi uliotuvutia, tunawapongeza kwa juhudi kubwa,” alisema Mwenyekiti wa CCM, mkoa wa Dar es Salaam, Bw. Ramadhani Madabida.

Akizungumza na waandishi wa habari mara baada ya kutembelea mradi huo kutoka kivukoni hadi kimara, Mwenyekiti huyo wa CCM mkoa alisema hatua iliyofikiwa na DART ni kubwa na inahitaji kuungwa mkono na wadau wote ili waweze kufanikiwa katika  awamu ya kwanza ambao utekelezaji wake umefikia asilimia 80.

“Haya ndio mambo ambayo watanzania tunatakiwa kujivunia kwa sababu miradi kama hii katika nchi zetu za kiafrika ni michache sana,” alisema.

Alisisitiza kuwa miradi mikubwa kama ulivyo wa BRT inahitaji utunzaji wa hali ya juu, ikiwa ni pamoja na nidhamu ya wananchi kuona kuwa jambo lililofanyika ni kwa ajili yao na si mtu mwingine.

“Naomba niwaambie watanzania wenzangu hasa wana Dar es Salaam, wakala umefanya kazi kubwa katika kusimamia mradi huu, kila mmoja awe mlinzi wa mwenzake katika kulinda miundombinu hii,” alisisitiza Mwenyekiti huyo.

Aliongeza kuwa utunzaji wa miundo mbinu unahitajika kwa kila mwananchi katika eneo lote lililopitiwa na mradi jambo alilosema litasaidia barabara hiyo kudumu kwa muda mrefu zaidi.

“Huu ni uwekezaji mkubwa sana na kioo cha jiji letu, mradi huu utakapo kamilika jiji la Dar es Salaam litabadilika,” aliongeza.

Awali, akitoa maelezo mbele ya wajumbe hao, Mtendaji Mkuu wa wakala wa DART, Bi. Asteria Mlambo alisema mradi unaendelea vizuri na uko katika hatua za mwisho za utekelezaji wake.

“Mradi unakwenda vizuri na hatua iliyofikia sasa ni hatua ya mwisho kwa sababu hadi sasa imebaki asilimia 20 ili uweze kukamilika,” alisema.

Aliwataka wananchi kutoa ushirikiano katika kuwabaini wale wote wanoharibu miundo mbinu ya barabara hasa katika maeneo ya Manzese na Magomeni kwa kutoa taarifa kwa vyombo husika pindi wanapoona hujuma inafanyika.

“Baadhi ya watu wasio waaminifu tayari wameanza kuiba miundombiu iliyowekwa jambo ambalo si la kistaarabu na wanaofanya hivyo ni vijana wetu wenyewe,” aliieleza kamati hiyo.

Aidha aliwataka wale wote wanaofanya biashara katika maeneo ya mradi kuondoka mara moja kabla ya sheria hazijafuata, ili kutoa nafasi kwa mkandarasi kufanya kazi zao pasipo usumbufu wowote.

Alisema Halmashauri ya Manispaa ya kinondoni inatakiwa kuliangalia jambo hili kwani liko ndani ya uwezo wao ili watu wanaofanya biashara ndani ya maeneo ya mradi kuondoka mara moja.

Mwisho