TNBC yachagiza viongozi Ruvuma kuchangamkia fursa

Katibu Mtendaji wa Baraza la Taifa la Biashara (TNBC) Bw. Raymond Mbilinyi akisisitiza jambo wakati wa mkutano na wajumbe wa baraza la biashara la mkoa wa Ruvuma ulifanyika katika mkoa huo hivi karibuni.  Mkutano huo ulizungumzia namna ya kuweka mazingira bora ya kufanya biashara ili kuharakisha maendeleo ya uchumi wa mkoa huo.

Katibu Mtendaji wa Baraza la Taifa la Biashara (TNBC) Bw. Raymond Mbilinyi (kulia) akiteta jambo na Mkuu wa mkoa wa Ruvuma, Bw. Said Mwambungu muda mfupi kabla ya kuanza kwa  mkutano wa baraza la biashara la mkoa wa Ruvuma katika mkoa huo hivi karibuni. Mkutano huo ulizungumzia namna ya kuweka mazingira bora ya kufanya biashara ili kuharakisha maendeleo ya uchumi wa mkoa huo. Katikati ni mtaalamu wa biashara na uwekezaji wa TNBC, Bw. Willie Magehema.

Na Mwandishi wetu, Songea

Viongozi mkoa wa Ruvuma wamehamasishwa kutumia vyema fursa kubwa za uchumi zilizo katika mkoa huo kubadilisha maisha ya watu wake, kupambana na umaskini pamoja na kuharakisha maendeleo.

Akiongea wakati wa mkutano wa baraza la biashara la mkoa huo hivi karibuni, Katibu Mtendaji wa Baraza la Biashara la Taifa (TNBC), Bw. Raymond Mbilinyi alisema fursa katika kilimo, madini na utalii katika mkoa huo vitumike kikamilifu.

“Wadau wa sekta ya umma na binafsi katika mkoa huu wana wajibu wa kushirikiana na kuhakikisha mazingira ya biashara na uwekezaji yanakuwa mazuri,” alisema. 

Alisema kwa sasa mkoa huo umefunguka na kuunganishwa na mikoa na nchi jirani kutokana na mifumo mizuri ya barabara zilizojengwa.

“Wana Ruvuma hamna budi kutumia fursa hii kukuza biashara zenu,” alisema.

Akitoa mfano, Bw. Mbilinyi alisema kwasasa si tatizo tena kusafiri kwenda na kutoka Ruvuma kuelekea Mtwara au Mbinga kutokana miundombinu mizuri na kuwa hiyo ni fursa ambayo inabidi itumike.

Aliwataka wajumbe wa baraza la biashara la mkoa kufanyia kazi mapendekezo ya mkutano huo ili yawe na matokeo yanayotarajiwa.

“Mfanyie kazi vikwazo vilivyoainishwa katika mkutano huu,” alisema.

Katika mkutano huo, wadau wa sekta binafsi na umma walijadiliana kwa uwazi matatizo mbalimbali kama kodi, mikopo na mengine ili kuyatafutia ufumbuzi.

“Umuhimu na upekee wa baraza la mkoa ni kuwa linaunganisha wajumbe wa sekta za umma na binafsi wanaokaa pamoja na kuamua kuhusu maendeleo…tumieni sana baraza hili,” alisema.

Kwa upande wake, mkuu wa mkoa wa Ruvuma, Bw. Said Mwambungu alisema ofisi yake itaendelea kutoa ushirikiano unaotakiwa ili baraza hilo la mkoa lifanye kazi vizuri na lifanikiwe.

“Tutaendelea kuhakikisha kuwa tunatoa mchango unaotakiwa ili kufanikisha kupatikana kwa haraka maendeleo,” alisema. 

Alisema ni imani yake kuwa yote yaliyojadiliwa katika mkutano huo yatapatiwa ufumbuzi wa kudumu.

Mkutano huo ulihudhuriwa na wajumbe mbalimbali wakiwemo Mamlaka ya Kodi Tanzania (TRA), mkoa; SIDO mkoa, taasisi za fedha, na wadau kutoka serikalini na sekta ya umma.

Mwisho