Watanzania watakiwa kuchangamkia fursa maeneo ya EPZA

Rais Jakaya Kikwete akisikiliza maelezo toka kwa Mkurugenzi Mkuu wa Mamlaka ya Ukanda Maalum wa Uwekezaji (EPZA), Dkt. Adelhelm Meru katika banda la Mamlaka hiyo wakati Rais alipotembelea maonyesho ya 38 ya biashara ya Kimataifa katika viwanja vya Mwalimu Julius Nyerere katika barabara ya Kilwa mwishoni mwa wiki jijini Dar es Salaam.

 Rais Jakaya Kikwete akiangalia baadhi ya bidhaa zinazozalishwa na moja ya kiwanda kilichowekeza katika eneo la Mamlaka ya Ukanda Maalum wa Uwekezaji (EPZA) wakati alipotembelea banda la  mamlaka hiyo katika maonyesho ya 38 ya Biashara ya Kimataiafa ya Dar es Salaam mwishoni mwa wiki.  Wa pili kushoto ni Mkurungenzi Mkuu wa Mamlaka hiyo, Dkt. Adelhelm Meru na mwakilishi  kampuni ya Fresh Air LTD, Bw. Bernard Harrison (kulia).

Mkurugenzi Mkuu wa Mamlaka ya Ukanda Maalum wa Uwekezaji (EPZA), Dk. Adelhelm Meru (kulia), akimueleza jambo Waziri wa Maendeleo ya Mifugo na Uvuvi, Dk. Titus Kamani (katikati) wakati Waziri huyo alipotembelea banda la  mamlaka hiyo katika maonyesho ya 38 ya Biashara ya Kimataiafa ya Dar es Salaam mwishoni mwa wiki.

Na Mwandishi wetu, Dar es Salaam

Watanzania wametakiwa kujivunia mafanikio yanayoendelea kujitokeza katika maeneo maalumu ya Mamlaka ya Ukanda Maalumu wa Uwekezaji (EPZA) na kuchangamkia fursa za uwekezaji katika maeneo hayo.

Waziri wa Maendeleo ya Mifugo na Uvuvi, Dkt. Titus Kamani alitoa ushauri huo wakati alipotembelea banda la mamlaka hiyo katika maonyesho ya 38 ya Biashara ya Kimataifa yanayoendelea katika viwanja vya Kumbukumbu ya Mwalimu Nyerere maarufu Sabasaba vilivyopo katika barabara ya Kilwa.

“Tunahitaji watanzania wajivunie mafanikio haya na kuchangamkia fursa za uwekezaji zinazoendelea kukua siku hadi siku,” alisema.

Alisema viwanda vilivyowekeza katika maeneo hayo vinazalisha bidhaa zenye viwango vya kimataifa na kuuzwa katika masoko ya kimataifa na kuiongezea nchi fedha za kigeni na ajira kwa watanzania.

Alisema hatua iliyofikiwa kwa sasa ni kubwa kwa vile kwa muda mrefu Tanzania ilikuwa hainufaiki na mazao yake kwa vile yaliuzwa bila ya kuyaongezea thamani.

Mwanzo tulikuwa nyuma katika utumiaji wa fursa za maeneo haya, sasa wawekezaji wamekuwa mstari wa mbele katika kuyatumia,”alisema.

Pia alisema mikoa ambayo ilikuwa inasuasua kutoa maeneo kwa ajili ya maeneo maalumu kwa ajili ya mmalaka, sasa wakati umefika kufanya hivyo kwa faida ya taifa.

Viwanda mbalimbali ambavyo vimewekeza chini ya leseni ya mamlaka ya EPZA vinashiriki maonyesho hayo vikiwemo Mazava cha Morogoro, Tanzania Tooku Garments Co. Ltd cha Dar es Salaam, Fresh Air Ltd, na Power Flour Ltd.

Akitembelea maonyesho hayo mwishoni mwa wiki, Rais Jakaya Kikwete pia alipita katika banda la mamlaka hiyo.

Mwanzoni mwa wiki iliyopita, ilitangazwa mshindi na kupata makombe katika maeneo mawili tofauti ya uendelezaji viwanda pamoja na kukuza biashara katika kundi la bidhaa za mauzo ya nje.

Uongezaji thamani mazao ya kilimo ni moja ya eneo linaloongoza kwa uwekezaji wa viwanda chini ya Mamlaka ya EPZA.

Kwa wastani, viwanda vilivyowekeza hadi sasa asilimia takribani 55 inahusisha uongezaji thamani mazao ya kilimo pamoja na ujenzi wa viwanda vya  useketaji wa nguo.

Maeneo mengine yanayovutia wawekezaji kuwekeza chini ya mamlaka hiyo ni pamoja na viwanda vya kuongeza thamani ngozi za wanyama ambazo hutumika kutengenezea bidhaa mbalimbali.

Mwisho