DAWASA yapania kumaliza tatizo la maji Dar

Na Mwandishi wetu, Dar es Salaam

Mradi wa upanuzi wa mtambo wa Ruvu juu na mingine inayoendelea inatarajiwa kuleta ahueni kubwa ya huduma za maji katika jiji la Dar es Salaam mara itakapokamilika.

Akiongea na waandishi wa habari jana jijini Dar es Salaam kuhusiana na miradi mbalimbali inayotekelezwa na serikali, katika ziara ya Naibu waziri wa Maji Mhe. Amos Makalla hivi karibuni, Kaimu Mkurugenzi wa Ufundi  wa DAWASA Mhandisi Romanus Mwang’ingo  alisema mradi wa upanuzi wa mtambo wa Ruvu juu ilianza rasmi tarehe 15 mwezi wa pili mwaka huu na itagharimu shilingi bilioni 65.11.

“Matarajio ni kumaliza kazi mwezi August 2015…upanuzi wa mtambo ukikamilika utaongeza uzalishaji kutoka lita milioni 82 hadi lita milioni 196,” alisema, na kuitaja kampuni inayojenga mradi huo kama VA TECH WABAG ya India.

Akielezea zaidi alisema mkandarasi ameanza kazi mbalimbali za matayarisho pamoja na kazi ya ujenzi wa eneo jipya la kuchujia maji lijulikanalo kitaalamu kama ‘Clarifier’.

Akielezea ulazaji wa mabomba ya kusafirisha maji Kutoka Ruvu juu Kwenda Kibamba na hatimaye Kimara, Mhandisi huyo alisema tayari mkataba kati ya DAWASA na kampuni ya Megha Engineering and Infrastructural Ltd kutoka India ulishasainiwa tangu mwezi wa kwanza mwaka huu na kuwa mradi huo unatarajiwa kukamilika baada ya miezi 18.

Alisema mradi huo utakaogharimu shilingi 97.3 bilioni ulianza rasmi mwezi wa tatu mwaka huu na matarajio ni kumaliza kazi mwezi Septemba 2015.

Alifafanua kuwa kazi zitakozohusika katika mradi huu ni pamoja na ujenzi wa bomba jipya kutoka Ruvu juu hadi Kibamba lenye kipenyo cha milimita 1200 (mita 1.2) na urefu wa kilomita 20 na bomba jipya kutoka Kibaha Tanita hadi Kibamba  hadi Kimara lenye kipenyo cha 1000mm na urefu wa kilomita 10.

Pia itahusisha ujenzi wa tenki jipya Kibamba lenye uwezo wa kuhifadhi maji lita milioni 10, na ukarabati au ujenzi wa matenki mawili ya Kimara.

“Mkandarasi amekamilisha upimaji na ameanza kutengeneza mabomba huko India na ameanza ujenzi wa jengo la ofisi ya mradi Kibaha,” alisema.

Akizungumzia upanuzi wa mtandao wa usambazaji maji na Kuunganisha Wateja, Mwang’ingo alisema upanuzi wa mtandao wa usambazaji maji katika maeneo yaliyo kandokando ya mabomba makuu kutoka Ruvu Chini na Ruvu Juu utaanza Septemba 2014.

“Maeneo yatakayonufaika na awamu hii ni vitongoji vilivyopo kati ya mji wa Bagamoyo hadi eneo la Tegeta na vitongoji vilivyopo kati ya mji wa Mlandizi na maeneo ya Mbezi na Kimara,” alisema na kuongeza kuwa kazi hii itatekelezwa kwa fedha kutoka India.

Makisio ya kihandisi yanaonyesha kuwa gharama itakuwa ni shilingi bilioni 40.

Alisema awamu itakayofuata ni upanuzi wa mfumo wa usambazaji maji katika maeneo yote ya jiji yatakayopata maji kutoka Kimbiji na Mpera, pamoja na maeneo ya jiji yasiyo na mabomba ya usambazaji.

“Mchakato wa kupata mshauri atakayesanifu na kutayarisha vitabu vya zabuni za ujenzi unaendelea,” alisema.

Alisisitiza kuwa matarajio ni kukamilisha usanifu Desemba 2014 na kuanza kazi ya ujenzi wa mtandao wa majisafi kuanza Januari 2015  na kukamilisha hatua kwa hatua kuanzia Desemba 2015 hadi Juni 2016.

Mwisho