Taasisi ya Wakurugenzi Tanzania mwenyeji wa mkutano mkubwa bara la Afrika

Makamu Mwenyekiti wa Mtandao wa Taasisi za Wakurugenzi Afrika ( ACGN) ambaye pia ni Ofisa Mtendaji Mkuu wa Taasisi ya Wakurugenzi Tanzania (IoDT), Bw. Said Kambi akisisitiza Jambo kwa waandishi wa habari juu ya Tanzania kuwa Mwenyeji wa mkutano mkubwa wa bara la Afrika,utakaofanyika jijini Dar es Salaam wiki Ijayo.

Na Mwandishi wetu, Dar es Salaam

Tanzania inatarajia kuwa mwenyeji wa mkutano mkubwa wa Mtandao wa Taasisi za Wakurugenzi Afrika (ACGN) kwa siku tatu kuanzia tarehe 23 mwezi huu jijini Dar es Salaam.

Akitangaza mkutano huo jana jijini Dar es Salaam, Afisa Mkuu Mtendaji wa Taasisi ya Wakurugenzi ya Tanzania (IoDT), Bw. Said kambi alisema mkutano huo utakutanisha viongozi wa mtandao huo.

Taasisi ya Wakurugenzi ya Tanzania ambayo ni moja ya waanzilishi wa mtandao huo ndio watakuwa wenyeji wa mkutano huo.

ACGN iliundwa kujenga uwezo wa wanachama wake kuimarisha uendeshaji wa mashirika, na kujenga mashirika bora barani Afrika miongoni mwa mambo mengine.

Mtandao huo pia unatoa fursa kwa watunga sera na wadau wengine kujadiliana kuhusiana na maswala mbalimbali yanayohusiana changamoto mbalimbali zinazohusiana na uendeshaji wa mashirika na kampuni barani Afrika.

Kwa mujibu wa Bw. Kambi ambaye pia ni Makamu Mwenyekiti wa mtandao huo, mkutano utatanguliwa na futari kwa washiriki na maafisa waandamizi wa makampuni walioalikwa hapa nchini siku ya tarehe 23 kabla ya kuanza kwa mkutano rasmi siku inayofuata.

“Tunatarajia kutambulisha wajumbe na washirika wapya wakati wa mkutano huo,” alisema.

Alitaja wajumbe wapya wanaotarajiwa kutambulishwa kama Taasisi za Wakurugenzi toka nchi za Misri, Ethiopia, Tunisia na Algeria.

Aliwataja washirika wapya kama Ethics Institute of South Africa (EISA), Association of Chartered Certified Accountants (ACCA), na African Security Exchanges Association (ASEA).

Pia alisema katika mkutano huo, ACGN itatiliana saini makubaliano ya ushirikiano na taasisi mbalimbali zikiwemo International Finance Corporation (IFC), EISA, ACCA, ASEA na Ernst &Young (EY).

Kwa upande wake, Mwenyekiti wa IoDT, Bw. Pius Maneno alisema uendeshaji bora wa mashirika barani Afrika ni muhimu sana kwa sasa ambapo biashara miongoni mwa mataifa ya Afrika inakuwa na pia mitaji ya uwekezaji barani humo inazidi kuongezeka.

“Imeonekena kuna umuhimu wa kuwa na mikakati ya kutengeneza miongozo ya uendeshaji mashirika ili kuchochea biashara na kuwa na viwango vya kimataifa barani Afrika,” alisema.

ACGN ilizinduliwa nchini Mauritius mwezi wa Kumi mwaka jana.

Waanzilishi wa mtandao huo walikuwa ni Taasisi za Wakurugenzi toka nchi za Kenya, Malawi, Mauritius, Morocco, Msumbiji, Afrika ya Kusini na Tanzania.

Wengine ni taasisi toka Uganda, Zambia na Zimbabwe.

Mtandao huu unalenga kujenga uwezo wa taasisi wanachama na kuendeleza uendeshaji bora wa mashirika katika sekta binafsi na umma barani Afrika.

Mwisho