Serikali, sekta binafsi wakaribisha uhusiano wa vyuo vya Mzumbe, Stellenbosch

Naibu katibu Mkuu wa Wizara ya Fedha, Prof. Adolph Mkenda (kulia) akiwa pamoja na Naibu Makamu Mkuu wa Chuo Kikuu Mzumbe, Fedha na Utawala, Prof. Faustin Kamuzora na Afisa Mkuu Mtendaji wa Kitengo kinachotoa mafunzo ya menejimenti katika shule ya biashara ya Chuo Kikuu cha Stellenbosch, Prof. Frik Landman (katikati) mwishoni mwa wiki jijini Dar es Salaam.  Chuo Kikuu Mzumbe kimefikia makubaliano na Chuo hicho ambapo kozi mbalimbali zitakuwa zinatolewa katika kampasi ya chuo hicho Dar es Salaam kuanzia mwezi wa Nane mwaka huu.

Naibu katibu Mkuu wa Wizara ya Fedha, Prof. Adolph Mkenda (kushoto) akiwa pamoja na Naibu Makamu Mkuu wa Chuo Kikuu Mzumbe, Fedha na Utawala, Prof. Faustin Kamuzora mwishoni mwa wiki jijini Dar es Salaam.  Chuo Kikuu Mzumbe kimefikia makubaliano na Chuo hicho ambapo kozi mbalimbali zitakuwa zinatolewa katika kampasi ya chuo hicho Dar es Salaam kuanzia mwezi wa Nane mwaka huu.  Prof. Mkenda ndie aliyezindua ushirikiano kati ya vyuo hivyo.

Na Mwandishi wetu, Dar es Salaam

Serikali na sekta binafsi nchini zimesifu ushirikiano mpya wa kitaaluma uliozinduliwa kati ya vyuo vikuu vya Mzumbe na shule ya biashara ya chuo kikuu cha Stellenbosch cha Afrika ya Kusini.

Chuo Kikuu Mzumbe kimeingia makubaliano na Chuo hicho kwa nia ya kutoa mafunzo ya menejimenti kwa maafisa wa serikali na sekta binafsi hapa nchini na Afrika ya Mashariki kwa ujumla.

Akiongea wakati wa uzinduzi wa programu hiyo mwishoni mwa wiki jijini Dar es Salaam, Naibu Waziri wa Fedha, Bw. Mwigulu Nchemba alisema ushirikiano huo ni hatua nyingine ya maendeleo kwa taifa.

Naibu Waziri huyo aliyewakilishwa na Naibu katibu Mkuu wa Wizara hiyo, Prof. Adolph Mkenda alisema serikali inakaribisha ushirikiano huo ambao alisema unaendana na mkakati wa serikali wa Matokeo Makubwa Sasa.

“Watanzania watafaidika na mpango huu ambao masomo yake yatakuwa yanatayarishwa na wataalamu toka vyuo hivi viwili,” alisema, na kuongeza kuwa serikali ingependa kuona ushirikiano kama huu zaidi hapa nchini.

Naibu Katibu Mkuu, Wizara ya Habari, Vijana na Utamaduni, Dk. Elisante Gabriel alisema ushirikiano huo umekuja wakati muafaka.

“Nawatakatia mafanikio na ninashauri kampuni hapa nchini kupeleka maafisa wake kusoma programu hizo zitakazokuwa zinatolewa Mzumbe,” alisema.

Mkurugenzi Mtendaji wa Taasisi ya Sekta Binafsi Tanzania (TPSF), Bw. Godfrey Simbeye alikaribisha uhusiano huo na kusema kuwa wadau wa sekta wanahitaji mafunzo kama hayo.

“Viongozi katika sekta binafsi wanatakiwa kuwa washindani na program hii inatoa fursa pekee kufanikisha hilo,” alisema.

Afisa Mkuu Mtendaji wa Kitengo kinachotoa mafunzo hayo katika Chuo Kikuu cha Stellenbosch, Prof. Frik Landman alisema kama sekta binafsi na serikali wataona umuhimu, uhusiano huo utakuwa chachu ya maendeleo ya Tanzania.

“Tunafuraha kuwa tunaweza kutoa mchango wetu kupitia njia hii,” alisema.

Alisema kuwa ni muhimu na kitu cha thamani kwa taasisi katika nchi zikawa na mameneja wenye ufanisi ili kuweza kuzalisha na kuleta tofauti.

Kwa upande wake, Naibu Makamu Mkuu wa Chuo Kikuu Mzumbe, Fedha na Utawala, Prof. Faustin Kamuzora alisema kuwa uhusiano huo unatokana na mpango mkakati wa chuo hicho unaolenga kushirikiana na taasisi toka sekta za umma na binafsi.

Alisema kuwa kuendeleza raslimali watu katika taasisi au kampuni yoyote ile ni jambo la msingi.

“Hii ni nafasi muhimu kwa taasisi hapa nchini,” alisema.

Kwa mujibu wa mratibu wa mafunzo hayo hapa nchini, Prof. Shiv Tripathi awamu ya kwanza ya mafunzo hayo itatolewa hapa jijini katika chuo hicho kuanzia tarehe 28-29 Agosti mwaka huu.

Prof. Tripathi ambaye pia ni Mkuu wa Kitengo cha Kozi fupi na Ushauri katika chuo hicho alisema mafunzo hayo yatatolewa na msomi maarufu duniani, Dr. John Westwood aliyekuwa katika shule ya biashara ya Manchester lakini sasa anaishi Afrika ya Kusini.

Mwisho

Mtandao wa Wakurugenzi Afrika wazidi kukua

Na Mwandishi wetu, Dar es Salaam

Mtandao wa Taasisi za Wakurugenzi Afrika (ACGN) umezidi kukua kwa kupata wajumbe wapya wawili katika mkutano wake jijini Dar es Salaam.

Wajumbe waliosaini makubaliano na mtandao huo ni taasisi ya wakurugenzi toka Tunisia na Kituo cha Utawala Bora cha Misri.

Makubaliano hayo yalifikiwa katika mkutano wa mtandao huo uliomalizika jijini hivi karibuni.

Kituo cha Utawala Bora wa Mashirika Taasisi ya wakurugenzi Ethiopia nayo iko katika mchakato wa kujiunga na ilihudhuria mkutano huo kama mtazamaji tu.

Pia mtandao huo ulifikia makubaliano ya ushirikiano na Taasisi ya Maadili ya Afrika ya Kusini pamoja na taasisi ya kimataifa ya uhasibu, ACCA.

“Tunazidi kukua lakini bado kazi ni kubwa...tunahitaji wanachama wengine zaidi,” Afisa Mkuu Mtendaji wa Taasisi ya Wakurugenzi Tanzania na Makamu Mwenyekiti wa ACGN, Bw. Said Kambi aliwaambia waandishi wa habari mwishoni mwa mkutano huo.

Mtandao huo ulianzishwa mwezi Oktoba mwaka jana.

Kwa sasa mtandao huo una wanachama taasisi toka nchi 13 na washirika wengine saba.

Alisema ushirikiano na taasisi ya maadili ya Afrika ya Kusini utasaidia kuimarisha maadili katika uendeshaji wa mashirika barani Afrika wakati ushirika na ACCA utasaidia kutoa mafunzo ya kitaalam, utafiti na kubadilishana taarifa.

Afisa Mkuu Mtendaji wa Taasisi ya Wakurugenzi Kenya, Bw. Meshack Jerome alisema utawala bora wa mashirika ni kitu muhimu kwa maendeleo ya nchi za Afrika ya Mashariki.

Alizitaka nchi wanachama wa jumuiya hiyo kuhakikisha zinazingatia uongozi bora wa mashirika ili kufikia maendeleo endelevu.

“Taasisi hii iliyoanza mwaka 2004 imesaidia kwa kiwango kikubwa nchi yetu kupambana na ufisadi na kuimarisha maadili katika nchi yetu,” alisema.

Kwa upande wake, Afisa Mkuu Mtendaji wa taasisi hiyo ya maadili Afrika ya Kusini, Prof. Deon Rossouw alisema utawala bora wa mashirika unahusu kuendesha mashirika kwa mafanikio na kwa uwazi.

“Nina furaha kuwa moja ya wadau wamtandao huu,” alisema.

Awali akiongea katika mkutano huo, Mwenyekiti wa ACGN, Bi. Jane Valls alizishauri serikali za Afrika na Tanzania kufikiria kuwa na muongozo thabiti utakaoweka viwango, na maadili yatakayopaswa kufuatwa na mashirika.

Bi. Valls ambae pia ni Afisa Mkuu Mtendaji wa Taasisi ya Wakurugenzi Mauritius (MIoD) alisema kuwa uendeshaji wa mashirika na makampuni ni jambo la muhimu sana kwa maendeleo endelevu ya nchi yoyote.

“Unaweza kuliangalia swala hili katika kiwango cha mashirika au nchi,” alisema.

Alisema kuwa uendeshaji bora wa mashirika barani Afrika ni muhimu sana kwa sasa ambapo biashara miongoni mwa mataifa ya Afrika inakuwa na pia mitaji ya uwekezaji barani humo inazidi kuongezeka.

“Imeonekena kuna umuhimu wa kuwa na mikakati ya kutengeneza miongozo ya uendeshaji mashirika ili kuchochea biashara na kuwa na viwango vya kimataifa barani Afrika,” alisema.

Waanzilishi wa mtandao huo walikuwa ni Taasisi za Wakurugenzi toka nchi za Kenya, Malawi, Mauritius, Morocco, Msumbiji, Afrika ya Kusini na Tanzania.

Wengine ni taasisi toka Uganda, Zambia na Zimbabwe.

Mtandao huu unalenga kujenga uwezo wa taasisi wanachama na kuendeleza uendeshaji bora wa mashirika katika sekta binafsi na umma barani Afrika.

ACGN iliundwa kujenga uwezo wa wanachama wake kuimarisha uendeshaji wa mashirika, na kujenga mashirika bora barani Afrika miongoni mwa mambo mengine.

Mtandao huo pia unatoa fursa kwa watunga sera na wadau wengine kujadiliana kuhusiana na maswala mbalimbali yanayohusiana changamoto mbalimbali zinazohusiana na uendeshaji wa mashirika na kampuni barani Afrika.

Mwisho

HABARI KATIKA PICHA

Afisa Mkuu Mtendaji wa Taasisi ya Wakurugenzi ya Tanzania (IoDT), Bw. Said kambi (kulia) akiwa pamoja na Bw. Jerry Masaga wa Tax Professionals wakati wa futari iliyotayarishwa kwa ajili ya maafisa wa kampuni mbalimbali hapa jana jijini Dar es Salaam.  Futari hiyo ilitayarishwa na taasisi hiyo na Mtandao wa Taasisi za Wakurugenzi Afrika (ACGN) ambao wanaendesha mkutano wao hapa nchini.

Wageni mbalimbali katika futari iliyotayarishwa kwa ajili ya maafisa wa kampuni mbalimbali hapa jana jijini Dar es Salaam.  Futari hiyo ilitayarishwa na Taasisi ya Wakurugenzi ya Tanzania (IoDT) na Mtandao wa Taasisi za Wakurugenzi Afrika (ACGN) ambao wanaendesha mkutano wao hapa nchini.

Afisa Mkuu Mtendaji wa Taasisi ya Wakurugenzi ya Tanzania (IoDT), Bw. Said kambi (kushoto) akiwa pamoja na Mkurugenzi wa Innovex, Bw. Leonard Chacha Kitoka (katikati) pamoja na Mwenyekiti wa Mtandao wa Taasisi za Wakurugenzi Afrika (ACGN), Bi. Jane Valls wakati wa futari iliyotayarishwa kwa ajili ya maafisa wa kampuni mbalimbali hapa jana jijini Dar es Salaam.  Futari hiyo ilitayarishwa na IoDT na ACGN ambao wanaendesha mkutano wao hapa nchini.

Mwenyekiti wa Taasisi ya Wakurugenzi ya Tanzania (IoDT), Bw. Pius Maneno (kushoto) akiwa pamoja na Afisa Mkuu Mtendaji wa IoDT, Bw. Said kambi (katikati) na Mkurugenzi wa Innovex, Bw. Leonard Chacha Kitoka (kulia) wakati wa futari iliyotayarishwa kwa ajili ya maafisa wa kampuni mbalimbali hapa jana jijini Dar es Salaam.  Futari hiyo ilitayarishwa na IoDT na ACGN ambao wanaendesha mkutano wao hapa nchini.

Wageni mbalimbali katika futari iliyotayarishwa kwa ajili ya maafisa wa kampuni mbalimbali hapa jana jijini Dar es Salaam.  Futari hiyo ilitayarishwa na Taasisi ya Wakurugenzi ya Tanzania (IoDT) na Mtandao wa Taasisi za Wakurugenzi Afrika (ACGN) ambao wanaendesha mkutano wao hapa nchini.