PASS yajidhatiti kukiwezesha Kilimo cha korosho mikoa ya kusini

Na Mwandishi wetu, Dar es Salaam

Asasi ya Kusaidia Uwekezaji Kwenye Kilimo (PASS Trust) imesema itaendelea kutoa misaada katika Kilimo cha korosho ili wananchi wa mikoa ya kusini ambao hutegemea zao hilo waweze kuondokana na hali duni ya vipato.

Mkurugenzi Mtendaji wa Asasi hiyo, Bw. Iddy Lujina aliwaambia waandishi wa habari katika mkutano wa wadau wa korosho jijini Dar es Salaam hivi karibuni kuwa zao la korosho ni moja ya mazao ambayo yanahitajika kupatiwa kipaumbele kwa maendeleo ya jamii.

“Asasi yetu imejidhatiti kuhakikisha zao hili linapiga hatua,” alisema na kuongeza kuwa tayari wameshaanza kusaidia wakulima, viwanda vya kusindika korosho na wasafirishaji kupata mikopo kuendeleza sekta ndogo ya korosho.

Mikoa ya kusini inayozalisha zao la korosho ni pamoja na Lindi, Mtwara, Pwani na wilaya ya Tunduru mkoani Ruvuma.

Aliongeza kusema kuwa hadi sasa wameshasaidia wakulima wa mikoa hiyo kupata mikopo kwa ajili ya kununua pembejeo, malori ya usafirishaji mazao na matrekta kwa ajili ya kilimo.

Pia wametoa mikopo ya kwa ajili ya ujenzi wa maghala ya mazao, na kwa ajili ya kununua mazao yanayoenda katika masoko ya nje.

Kutokana na mchango wake, PASS ilikuwa moja ya taasisi zilizoshirikishwa katika mkutano huo wa wadau wa korosho.

Alisema Asasi yao imefungua tawi Mtwara kwa ajili ya kuhudumia wakulima wa kanda hiyo kupata msaada wa mikopo kuendeleza Kilimo likiwemo zao hilo.

Alisisitiza kuwa wakulima nchini wanahitaji kuwezeshwa kwa vile asilimia kubwa ya watanzania hutegemea shughuli za Kilimo kujipatia vipato.

“Zao la korosho soko lake ni kubwa hivyo Kilimo hicho kipatiwe vipaumbele kwa lengo la kufikia malengo yake,” alisema.

Aliendelea kusema kuwa misaada wanayoitoa ni moja ya hatua za kuunga mkono juhudi zinazofanywa na serikali za kuendeleza Kilimo hapa nchini.

“Mikati ya serikali ya matokeo makubwa sasa na mipango ya kufikia uchumi wa kati inatakiwa kwenda sambamba na mipango ya kukiwezesha Kilimo kukuwa,” alisema.

Hivi karibuni wadau wa sekta ndogo ya korosho walikutana jijini Dar es Salaam kujadili maswala mbalimbali ya kukuza zao hilo katika mnyororo wake.

Kupitia huduma zake, mwaka 2011 PASS ilisaidia wakulima 11,000 kupata mikopo yenye thamani ya Tshs 22 bilioni kutoka kwenye benki mbalimbali na mikopo hiyo ilipanda hadi kufikia Tshs 30 bilioni mwaka jana.

Hadi sasa, taasisi hiyo ina matawi katika mikoa ya Morogoro, Mbeya, Dar es Salaam, Mwanza, Moshi na Mtwara.

Katika miaka kumi iliyopita, PASS imeweza kusaidia wakulima zaidi ya 100,000 kupata mikopo na katika mpango wake mpya wa miaka mitano inatarajia kusaidia wakulima zaidi ya 300,000 kuweza kupata mikopo yenye thamani ya Tshs 290 bilioni.

PASS ilianzishwa mwaka 2000 chini ya mpango wa uendelezaji sekta ya kilimo(ASPS) kwa msaada kutoka serikali ya Kifalme ya Denmark kwa Jamhuri ya Muungano wa Tanzania.

Mwisho