EPZA yatoa leseni kwa wawekezaji wapya sita

Mkurugenzi Mkuu wa Mamlaka ya Ukanda Maalum ya Uwekezaji nchini (EPZA), Dkt.  Adelhelm Meru akimkabidhi leseni ya uwekezaji Mkurugenzi wa Mambo Coffee Co. Ltd, Bw. Athanasio Massenha mwishoni mwa wiki jijini Dar es Salaam.  Mamlaka hiyo ilikabidhi leseni hizo kwa wawekezaji wapya sita.

Mkurugenzi Mkuu wa Mamlaka ya Ukanda Maalum ya Uwekezaji nchini (EPZA), Dkt.  Adelhelm Meru akimkabidhi leseni ya uwekezaji mmoja wa wakurugenzi wa kampuni ya Sheikh Motors Ltd mwishoni mwa wiki jijini Dar es Salaam.  Mamlaka hiyo ilikabidhi leseni hizo kwa wawekezaji wapya sita.

Na Mwandishi wetu, Dar es Salaam

Mamlaka ya Ukanda Maalumu wa Uwekezaji nchini (EPZA) imekabidhi leseni za uwekezaji katika maeneo yake kwa makampuni mapya sita.

Mkurugenzi Mkuu wa EPZA, Dkt. Adelhelm Meru alikabidhi leseni hizo mwishoni mwa wiki jijini Dar es Salaam na kusema kuwa hatua hiyo ni ithibitisho wa nia ya mamlaka yake kuendeleza sekta ya viwanda hapa nchini.

“Kuendeleza sekta ya viwanda ni moja ya ajenda kuu ya mamlaka yetu,” aliwaambia waandishi wa habari baada ya kukabidhi leseni hizo.

Kampuni zilizokabidhiwa leseni ya EPZ ni pamoja na Kokoa Kamili Ltd, Rift Valley Tea Ltd, Mambo Coffee Ltd, Sheikh Motors Ltd, Afriweld Industries Ltd na Tanzania Macenta Co Ltd.

Kampuni hizo zimejikita katika kuendesha viwanda vya kuongeza thamani mazao na vitu mbalimbali hapa nchini.

Kati ya kampuni hizo sita; mbili ni za wawekezaji toka Uingereza na Marekani wakati mbili nyingine ni za ubia kati ya watanzania na wawekezaji wenzao toka nchi za Ukraine na India.  Kampuni mbili zilizobaki zinamilikiwa kwa asilimia mia moja na wawekezaji wazawa.

Jumla ya uwekezaji wa uliofanywa na kampuni hizo ni dola za Marekani milioni 17 na zinatarajiwa kuzalisha ajira mpya zaidi ya 700.  Pia, thamani ya mauzo ya nje ya kampuni hizo kwa mwaka yanatarajiwa kufikia zaidi ya dola za kimarekani milioni 23 kwa mwaka.

Dkt. Meru alisisitiza kuwa nchi zote zilizopata maendeleo zilifanya jitihada kuwekeza katika viwanda na kwamba ni muhimu pia Tanzania ifuate mkondo huo.

“Hatuwezi kupata maendeleo ya maana kama hatutawekeza kwenye viwanda…na hiki ndicho tunachojaribu kufanya,” alisema Dkt. Meru.

Alisema viwanda vitazalisha ajira, kuleta fedha zaidi, teknolojia na kuongeza thamani mazao kwa malighafi za hapa nchini.

Alisema kwa sasa, Tanzania inapata hasara kwa kiwango cha juu kutokana na kuuza mali ghafi badala ya bidhaa zilizoongezwa thamani na kwamba hali hii inatakiwa kurekebishwa haraka.

“Unapouza mali ghafi nje unageuka kuwa soko la bidhaa hizo hizo baada ya kuongezwa thamani,” alisema, na kueleza kwamba ujio wa kampuni hizo unalenga kupunguza tatizo hilo.

Dkt. Meru aliwaambia viongozi wa kampuni hizo kuwa kwa kufanya kazi katika maeneo ya mamlaka hiyo, watafaidika na kuona umuhimu wa kufanya kazi na EPZA.

“Sisi pia ni kama daraja kwa taasisi nyingine za serikali,” alisema na kuongeza kuwa mamlaka yake itaendelea kuwasaidia na kuhakikisha kuwa wanapata mafanikio.

Alisema baadhi ya makampuni yatafanya kazi katika mikoa mingine nje ya Dar es Salaam na kueleza kuwa hii ni hatua njema inayoonyesha kuwa sasa Tanzania inaanza kufunguka.

Kuhusu kampuni zinazomilikiwa na watanzania alisema huo ni uthibitisho kuwa watanzania wanaweza na kuwa wengine waige mfano huo kwa faida yao nay a nchi.

Mkurugezi wa Mambo Coffee Co. Ltd, Bw. Athanasio Massenha alisema walihamasika kuomba leseni ya EPZ baada ya kugundua vivutio vya uwekezaji vinavyotolewa na mamlaka hiyo kwa wawekezaji.

“Kama wawekezaji wazalendo, tunafurahia hatua hii muhimu,” alisema.

Kwa upande wake, Meneja wa Utawala na Masoko wa Rift Valley Tea Solutions Ltd, Bw. Dilip Rughani alisema leseni hiyo na kwamba itawawezesha kuwa washindani wazuri katika eneo hili la Afrika.

“Hii itatuwezesha kushindana na kampuni kama yetu zilizo nchi jirani,” alisema na kuongeza kuwa itawasaidia kupanua biashara yao.

Mwisho