IEEE yashauri viwanda,kampuni kufanya tafiti za kisayansi

Na Mwandishi wetu, Dar es Salaam

Taasisi ya Wahandisi wa Umeme na Elektroniki Duniani (IEEE) imeishauri sekta ya viwanda na kampuni mbalimbali nchini kusaidia kufanya tafiti ili kuja na ubunifu ambao utasaidia maendeleo na kukuza ustawi wa jamii.

Rais wa Taasisi hiyo tawi la Tanzania, Dkt. Zaipuna Yonah ambaye pia ni Mhadhiri, Chuo Kikuu cha Sayansi na Teknolojia cha Nelson Mandela aliwambia waandishi wa habari jijini Dar es Salaam mwishoni mwa wiki kuwa sekta binafsi ina wajibu wa kufanya tafiti kusaidia jamii.

Alikuwa akizungumza wakati wa ziara ya Rais Mteule wa taasisi hiyo kubwa dunaini, Dr. Roberto de Marca aliyekuwa nchini kukutana na wanachama na kuhamasisha sayansi na teknolojia.

“Taasisi yetu inapenda kuona sekta ya viwanda na kampuni zinazidisha juhudi katika eneo hili muhimu  na siyo kuiachia serikali peke yake kufanya tafiti hizo,” alisema.

Alisema hadi sasa viwanda na makampuni nchini vinaangalia zaidi kufanya biashara na kutengeneza fedha, wakati wanaweza kuingia katika eneo hilo la tafiti na kuja na huduma mpya na kutengeneza fedha zaidi.

Akitoa mfano alisema huduma ya Mpesa ni ubunifu uliofanywa hapa nchini na watanzania na inatumiwa na watu wa vipato vyote, na kwamba ubunifu wa namna hii ukiendelea utazidi kuboresha huduma na maendeleo ya taifa.

“Taasisi hii  inatambua taaluma 11 za sayansi zikiwemo uhandisi wa aina zote na wataalamu  wote wanaotumia TEHAMA wanaruhusiwa kujiunga,” alisema.

Naye Rais wa taasisi hiyo, Profesa Roberto B.de Marca alisema Tanzania inatakiwa kuwekeza zaidi katika elimu na kutoa motisha kwa wanafunzi katika masomo ya sayansi.

“Natambua nchi hii ina vyuo vikuu vya kutosha na vinaweza kuzalisha wahandisi wengi na bora,” alisema na kuongeza kuwa kinachohitajika ni kuwekeza zaidi eneo hili.

Aliongeza kusema kuwa wahandisi wakiwa wengi na bora husaidia kukuza uchumi na kuanzisha miradi ambayo itatoa ajira kwa jamii.

Alisema dhamira ya taasisi yake ni kuona Afrika na Tanzania ikiwa mojawapo inaongeza wahandisi ili kuwa chachu ya maendeleo.

Alisisitiza kuwa taasisi yake itaendelea kuwa karibu na wanachama wake wa Tanzania na kuwahamasisha wahandisi kufanya tatifi ili kusaidia nchi.

Mwanafunzi anayesomea Uhandisi  (BSC Computer Engineering & IT) Chuo Kikuu cha Dar es Salaam, Bi. Tumwagile Gedion alisema TEHAMA ina nafasi kubwa ya kubadilisha maisha ya binadamu.

“Tumekutana na Rais wa taasisi hii na tumejifunza vitu vingi...mimi na wenzangu tunajiunga nayo ili kuwa wanafamilia wa taasisi hii muhimu duniani,” alisema.

Alisema Tanzania inaweza kuendelea kama itaweka vipaumbele vya kuendeleza taaluma hiyo ikiwemo kukuza miundombinu ya elimu ili wanafunzi wapende kusoma masomo ya sayansi.

Akiwa chini pamoja mambo mengine, Rais huyo alikutana na wanachama wa taasisi hiyo na wanafunzi wa fani za uhandisi wa vyuo vikuu mbalimbali, kikiwemo  Chuo Kikuu cha Dar es Salaam, Taasisi ya Teknolojia Dar es Salaam (DIT), na ST. Joseph Engineering.

Taasisi hiyo yenye makao makuu nchini Marekani ina wanachama 425,000 duniani katika nchi 160. Kuna jumla ya wanachama 100 Tanzania.

Mwisho.