Mchakato wa Serikali kumiliki TTCL asilimia 100 waendelea

Na Mwandishi wetu, Dar es Salaam

Serikali imsema inaendelea na mchakato wa majadiliano na Kampuni ya Simu za Mikononi ya Airtel kuiwezesha serikali kumiliki hisa zote za Kampuni ya Mawasiliano ya (TTCL).

Naibu wa Waziri, Wizara ya Mawasiliano, Sayansi na Teknolojia, Bw. January Makamba alisema wakati akifunga Kikao cha Baraza Kuu la Wafanyakazi wa TTCL jijini Dar es Salaam wiki iliyopita kuwa ni nia ya serikali kuona inaimiliki TTCL kwa asilimia 100.

“Kwa sasa shirika hili lina miundombinu yote na uwezo wa kufanya kazi vyema,”alisema.

Kwa sasa kampuni ya Airtel inamiliki asilimia 65 wakati TTCL inamiliki asilimia 35.

Aliongeza kusema kuwa ni dhamira ya wizara na serikali kwa ujumla kuona TTCL inashika hatamu katika kuongoza sekta ya mawasiliano hapa nchini ili kufikisha huduma hiyo sehemu zote za nchi.

Aliitaka kampuni hiyo kuingia katika teknolojia ya masafa ya GSM ambayo yanawezesha wateja wake kutumia simu moja kwa laini zaidi ya moja tofauti na teknolojia inayoyotumika sasa ya CDMA ambayo inatumia laini moja tu.

Alisisitiza kwamba serikali itaiwezesha kampuni kupata mkopo kwa ajili ya kufikia malengo yake hayo ili kuzidi kutoa huduma bora kwa watanzania.

Pia alipongeza kampuni hiyo kwa kutoa huduma bora ya mkongo na aliagiza uongozi kuzidi kuutunza na kutafuta masoko zaidi ili watu wazidi kupata hudma za mawasiliano yakiwemo ya intaneti kwa ufanisi na urahisi.

Aliwaambia wafanyakazi kuwa historia ya kampuni hiyo kufanya vibaya huko nyuma sasa ni historian a kuwataka kufanya kazi kwa bidii na kwa kufuata sheria zilizopo.

“Ninaamini tunaweza kufanya vema zaidi ya tulivyo fanya nyuma...ni dhamira ya serikali kufikia azma hiyo,” alisema na kuongeza kuwa TTCL ina kila sababu za kuongoza sekta ya mawasiliano hapa nchini.

Kwa upande wake, Afisa Mtendaji  Mkuu TTCL, Dkt. Kamugisha Kazaura alisema mpango mkakati wa Kampuni wa miaka mitatu 2013-2015 ni kutekeleza miradi  kwa kuongezwa tija na ufanisi.

“Kampuni imedhamiria kuboresha mapato kutoka Tshs bilioni 92.3 mwaka 2012 hadi Tshs bilioni 111.8 mwaka 2014,” alisema.

Aliongeza kuwa pia wamepanga kuongeza idadi ya wateja wa huduma mbalimbali za simu, sauti na data.

Alisema pia wanatarajia kuboresha makusanyo ya mapato na madeni ya kampuni yanayotokana na huduma za simu zinazotolewa kila mwezi kwa wateja wake, ikiwemo serikali kuu na taasisi zake.

Alisisitiza kuwa katika mpango mkakati wa kibiashara wa mwaka 2014 -2016 kampuni imedhamiria kujizatiti zaidi katika nyanja ya huduma za intaneti na pia kuingia kwa dhati katika ushindani wa soko la simu za mkononi kwa kutumia teknolojia ya 4G LTE na GSM.

Alisema kampuni inakabiliwa na changamoto ya ukosefu wa fedha za kutosha kuwezesha kampuni kujipanua kibiashara, ushindani wa kibiashara na hujuma ya mtandao.

Kikao Kikuu cha baraza la wafanyakazi kilikuwa cha siku tatu na kuhusisha wajumbe wake toka nchi nzima kujadiliana maswala mbalimbali ya kuendeleza kampuni hiyo.

 Mwisho