EPZA yakaribisha wawekezaji toka ulaya

Na Mwandishi wetu, Dar es Salaam

Mamlaka ya Ukanda Maalumu wa Uwekezaji nchini (EPZA) imesema iko tayari na inawakaribisha wawekezaji toka nchi za ulaya kuwekeza katika maeneo yake.

Mkurugenzi Mkuu wa Mamlaka hiyo, Dkt. Adelhelm Meru aliwaambia waandishi wa habari hivi karibuni kuwa maeneo maalumu ya mamlaka hiyo yanatoa fursa nzuri kwa wawekezaji hao kufaidika na uwekezaji wao hasa katika maeneo ya viwanda.

Dkt. Meru alikua akiongea mara baada ya kumalizika kwa kongamano lililohusisha wafanyabiashara wa Tanzania kwa upande mmoja na wenzao kutoka na nchi za Ubelgiji, Italia na Ugiriki lililofanyika jijini humo hivi karibuni.

“Tunawakaribisha kuwekeza katika maeneo yetu na tuko tayari kufanya nao kazi,” alisema.

Alisema mamlaka yake iko katika jitihada za kuongeza zaidi maeneo ya uwekezaji ili kuvutia wawekezaji wengi zaidi toka ndani na nje ya nchi.

Alisema ujio wa wawekezaji hao unafungua sura mpya ya mahusiano na nchi za ulaya ambazo miaka ya nyuma zilikuwa mshiriki mzuri kwenye uwekezaji Tanzania.

“Ujio huu unafungua ukurasa mpya wa mahusiano ya kibiashara na Tanzania ipo tayari kushirikiana nao,” alisema.

Alisema kwa sasa Tanzania ni nchi inayovutia nchi kubwa kuja kuwekeza kutokana na juhudi za Rais Jakaya Kikwete kuitangaza nchi nje na kufanikiwa kwa kiasi kikubwa.

“Rais Jakaya Kikweze anastahili kupongezwa kwa kazi anayoifanya kwa sababu kukaribisha wawekezaji ni kupanua wigo wa walipa kodi hapa nchini,” alisema.

Kwa upande wake, Mkurugenzi Mtendaji wa Taasisi ya Sekta Binafsi Tanzania (TPSF), Bw. Godfrey Simbeye alisema sekta binafsi iko tayari kufanya kazi na wawekezaji hao.

Bw. Simbeye alisema kama kiunganishi cha sekta binafsi Tanzania, TPSF iko tayari kufanya kazi na wafanyabiashara hao kwa faida ya Tanzania na nchi zao pia.

“Hii ni neema kwa nchi yetu…ni lazima tuitumie nafasi hii,” alisema.

Alisema TPSF ni chombo imara kinachowakilisha sekta binafsi Tanzania na kwamba kwa kufanya nacho kazi, wawekezaji hao watajihakikishia faida hapa nchini na kurahisisha kazi zao.

Aliwaambia kuwa Tanzania imeweka mfumo mzuri wa wawekezaji na wafanyabiashara kuwasiliana na serikali na kuelezea mawazo yao, mazingira aliyosema kuwa ni faida kwa wale wanaotaka kuja kuwekeza na kufanya biashara Tanzania.

Alitoa changamoto kwa wafanyabiashara wa Tanzania kuhakikisha wanahudhuria makongamano kama hayo maana ni fursa ya kujenga mahusiano ya kibiashara.

“Wafanyabiashara wajenge utamaduni wa kuhudhuria makongamano kama haya...hii ni kwa faida yao na ya nchi pia,” alisema.

Mwisho