RUBADA yawataka maafisa ugani kuwa wabunifu

 Mkurugenzi Mkuu wa Mamlaka ya Usimamizi wa Bonde la Mto Rufiji (RUBADA), Bw. Aloyce Masanja akizungumza na viongozi wa halmashauri ya wilaya ya Morogoro wakati wa semina ya mafunzo kuhusiana na mpango wa serikali wa Matokeo Makubwa Sasa na Kilimo Kwanza hivi karibuni Morogoro.

Mkuu wa Wilaya ya Morogoro, Bw. Said Amanzi (katikati) akizungumza na watendaji wa ngazi mbalimbali wa Halmashauri ya wilaya ya Morogoro wakati wa semina juu ya mpango wa serikali wa Matokeo Makubwa Sasa na Kilimo Kwanza hivi karibuni Morogoro. Kushoto ni Mkurugenzi Mkuu wa Mamlaka ya Uendelezaji wa Bonde la Mto Rufiji  (RUBADA), Bw. Aloyce Masanja, na Mwenyekiti wa Halmashauri ya wilaya hiyo, Bi. Kibena Kingu.

Na Mwandishi Wetu, Morogoro

Mamlaka ya Uendelezaji wa Bonde la Mto Rufiji (RUBADA) imewataka maafisa ugani katika halmashauri ya Wilaya ya Morogoro vijijini, kuwa wabunifu katika utendaji wao wa kazi ili waweze kuongeza thamani ya mazao, pamoja na kutoa elimu stahiki kwa wananchi wanaowatumikia.

Mkurugenzi Mkuu wa RUBADA, Bw. Aloyce Masanja alitoa ushauri huo katika halmashauri ya  Wilaya ya Morogoro Mkoani humo wakati wa semina elekezi kwa watendaji wa halmashauri hiyo juu ya mpango wa serikali wa Matokeo Makubwa Sasa ( BRN) hivi karibuni.

“Ni vyema maafisa ugani wakaelewa kuwa wao ndio viongozi katika suala la kutoa maelekezo kwa wananchi wao,” alisema.

Alisema maafisa ugani waliopo ni wachache kulinganisha na mahitaji yaliyopo katika vijiji, hivyo kazi kubwa iliyopo ni kujaribu kuwapa elimu ili waendane na mfumo uliopo na mahitaji ya wakati.

“Tumekuwa na wagani wachache katika vijiji, japo wanafanya kazi lakini wamekuwa sio mfano bora kwa wale wanaowatumikia, kutokana na wao wenyewe kutojishughulisha na kilimo na ndio maana hata wananchi wamekuwa na hamasa ndogo juu ya suala la kilimo,”alisema Masanja.

Aliongeza kuwa utamkuta afisa ugani hana hata shamba au mfugo japo mmoja tu jambo linalosababisha wao wenyewe kutokuwa na mwamko katika sekta ya kilimo na mifugo katika vijiji wanavyofanyia kazi.

Akizungumzia suala la upungufu wa maghala ya chakula katika wilaya ya Morogoro vijijini, Bw. Masanja alisema tatizo hilo linatokana na kuwepo na maghala ya zamani na ambayo hayana viwango vya kuweza kuhifadhi chakula.

“Katika mpango wa Matokeo Makubwa Sasa tunataka kila kijiji kiwe na kilimo cha umwagiliaji na patajengwa ghala la kisasa kwa ajili ya kuhifadhia chakula,” alisema.

Alisisitiza kuwa kwa sasa kuna upotevu mkubwa sana wa chakula hasa mpunga na mahindi kutokana na kutohifadhiwa katika maeneo maalumu, hivyo kusababisha njaa zisizokuwa za lazima katika maeneo kadhaa ya wilaya hiyo.

“Watu hawana ufahamu wa uhifadhi, chakula kimekuwa kikiwekwa chini…ni muhimu swala hili lirekebishwe,” alisisitiza Mkurugenzi huyo.

Akizungumzia swala la usindikaji katika wilaya hiyo, alisema watu wamekuwa wakiuza mazao kiholela bila kuyafanyia usindikaji, jambo ambalo limekuwa likiwasababishia kukosa soko la kueleweka na hivyo kukosa kipato cha kujikimu.

“Chakula kingi kinauzwa kama kilivyo, badala ya kuuza mchele tunauza mpunga, na badala ya kuuza unga tunauza mahindi, hili ni tatizo kubwa kwa wakulima,” alisema.

Aliwataka watendaji kuwaunganisha wananchi wao katika vikundi na kuunda umoja wao, ili wawe na mashine za kukobolea jambo litakalokuza soko la mazao yao na kuongeza thamani.

Kwa upnde wake, Mkuu wa Wilaya ya Morogoro Bw. Saidi Amanzi, alisema serikali ina nia nzuri ya kuwakomboa wananchi wake kiuchumi, hivyo ni vema wakaunga mkono juhudi zinazofanywa na serikali yao.

“Sisi upande wa serikali tunajitahidi kutoa elimu kwa wananchi juu ya suala la kilimo chenye tija na kitakachomkomboa mwananchi,” alisema Amanzi.

Aliongeza kuwa Wilaya ya Morogoro hasa maeneo ya vijijini wamehamasika kwa kiasi kikubwa na mipango mbalimbali ya serikali ya kukuza kilimo katika maeneo hayo.

Mwisho 

Wafanyabiashara wa Tanzania, Botswana wahimizwa kuchangamkia fursa

N a Mwandishi wetu, Dar es Salaam

Wafanyabiashara wa Tanzania wamehamasishwa kutumia fursa za kibiashara kuwekeza nchini Botswana hasa baada ya nchi hiyo kufungua ubalozi mdogo hapa nchini.

Waziri wa Mambo ya Nje na Ushirikiano wa Kimataifa, Bw. Bernard Membe alisema wakati akifungua ofisi hiyo ya ubalozi mdogo jana jijini Dar es Salaam  kuwa sasa ni wakati mwafaka kwa wafanyabiashara watanzania kuitumia ofisi hiyo kuimarisha biashara zao na uhusiano na wenzao toka nchi hiyo.

Ufunguzi wa ofisi hiyo unakuja miezi saba baada ya nchi ya Botswana kumteuwa Mtanzania, Bw. Emmanuel Ole Naiko kuwa balozi wa heshima anayeiwakilisha nchi hiyo hapa Tanzania.

“Pamoja na mambo mengine, ofisi hii sasa itatumika katika kuwaunganisha wananchi wa nchi hizi hasa katika maswala ya biashara na uwekezaji,” alisema Waziri Membe.

Alisema uhusiano wa Tanzania na Botswana ni wa kihistoria tangu miaka ya 60 wakati waasisi ya nchi hizo walipofanyakazi pamoja katika kupigania uhuru na maendeleo ya nchi zao.

“Hatua hii ni uthibitisho wa uhusiano wa kihistoria uliopo kati ya nchi hizi,” alisema.

Alitaja maeneo ambayo nchi hizo zinaweza kushirikiana kama kuendeleza wananchi wa pande hizo kama madini, Kilimo, ufugaji na utalii na nyingine.

Awali nchi hiyo haikuwa na Balozi nchini Tanzania, badala yake ilikuwa ikimtumia Balozi wa Zambia kushughulikia maswala yake hapa nchini.

“Hakuna ulazima wa watanzania kuomba visa kwenda Botswana...tuitumie nafasi hiyo kwa maendeleo,” alisema.

Kwa upande wake, Bw. Ole Naiko alisema ofisi hiyo inakaribisha wafanyabiashara wa nchi zote mbili kuitumia na kutafuta fursa zilizopo katika nchi zote ili kukuza biashara na uwekezaji.

“Nchi hizi zina mambo ambayo kilamoja inaweza kufanya kwa ufanisi...tukiunganisha nguvu zetu tutaweza kusonga mbele kwa mafanikio,” alisema.

Alisema Botswana imepiga hatua kubwa katika kuongeza thamani ya madini yake na kwamba hilo ni eneo moja ambalo Tanzania inaweza kujifunza ili kufaidika na madini yake.

“Tukishafahamu wenzetu wanafanya nini katika kuongeza thamani madini yao tujifunze na kutumia maarifa hayo katika sekta nyingine kama kilimo,” alisisitiza.

Alisema kufikia malengo hayo kunahitajika kuzidi kuongeza misingi ya utawala bora na kupiga vita rushwa, vitu ambavyo vinarudisha nyuma harakati za maendeleo.

Naye Balozi wa Botswana nchini Zambia na Tanzania, Bi. Tuelonyana Oliphant alisema nchi yake inayo furaha kufungua ubalozi mdogo nchini Tanzania.

“Kwa niaba ya serikali ya Botswana, natoa shukrani kwa serikali ya Tanzania kuturuhusu kufungua ofisi hii,” alisema.

Nchi ya Botswana imepakana na nchi za Afrika ya Kusini, Zimbabwe, Namibia na Zambia. Ina ukubwa wa Sq km 58,200, na wakazi Milioni 2.

Ni nchi iliyo na amani na utulivu toka uhuru na ina kiwango kidogo sana cha rushwa barani Afrika.

Nchi hiyo imedhamiria kuongoza katika sekta za fedha, madini hasa Uranium, shaba na usafirishaji wa almasi, na Copper na pia kuendeleza uwekezaji katika sekta ya utalii kwani Botswana ina mbuga nyingi za wanyama na hasa Vistoria Falls ambayo iko mpakani na Zimbabwe na Zambia katika mji wa Kasane.

Mwisho