DART, Maofisa Mawasiliano Kushirikiana Kutoa Elimu Ya Mradi

Mkurugenzi wa Utawala, Raslimali Watu na Mawasiliano wa Wakala wa Mabasi Yaendayo Haraka (DART), Bw. Evodius Katare akisisitiza jambo kwa Maofisa Mawasiliano na Habari kwenye mkutano maalumu uliondaliwa kuwajengea uwezo maofisa hao ambao Taasisi zao ni wadau wakuu wa mradi huo. Mkutano huo ulifanyika Jijini Dar es Salaam mwishoni mwa wiki.

Na Mwandishi Wetu, Dar es Salaam

Wakala wa Mabasi Yaendayo Haraka (DART) umetaka kuwepo kwa ushirikiano miongoni mwa maofisa habari na  mawasiliano wa taasisi zinazoguswa na mradi moja kwa moja ili kusaidia kutoa elimu na taarifa sahihi kwa wananchi juu ya uendeshaji na usimamizi wake.

Mkurugenzi wa Utawala , Rasilimali Watu na Mawasiliano wa DART, Bw.Evodius R. Katare, amesema maofisa habari na mawasiliano ni nguzo muhimu katika utoaji wa taarifa za Mradi na hivyo ili wananchi waweze kuuelewa mradi ni lazima kuwe na ushirikiano miongoni mwao.

“Sisi kama DART tunaamini kuwa maofisa habari na mawasiliano wa Taasisi zote zinazoguswa na mradi huu wakiulewa vizuri mradi huu na kubadilishana taarifa itasaidia sana kuwaelimisha wananchi na kuwajengea uelewa mkubwa,” alisisitiza Bw.Katare.

Akizungumza na maofisa wa habari na mawasiliano kutoka Mamlaka ya Usimamizi wa Usafirishaji wa Majini na Nchi Kavu (SUMATRA), Wakala wa Barabara  nchini (TANROADS),Wizara ya Ujenzi, Strabag, SMEC, Jiji la Dar es Salaam, Manispaa za Ilala, Kinondoni na Temeke mwishoni mwa wiki, Mkurugenzi huyo aliwataka maofisa hao kuwa kitu kimoja na kukutana kila wakati na kuzumzia maendeleo ya Mradi.

“Nyinyi ni wadau wakubwa sana wa Mradi na hivyo mnapaswa kujua kila hatua ya maendeleo ya Mradi ili muweze kuwafamisha wananchi na kwa maana hiyo ni vyema mkaandaa utaratibu ambao utawawezesha kukutana mara nyingi,” alisisitiza.

Kwa upande wake Meneja wa Mawasiliano wa SUMATRA, Bw. David Mziray alisema mkutano utaleta tija katika kufikisha ujumbe kwa jamii juu ya Mradi kwa wadau kwa kuwa na sauti moja toka taasisi zote zinazoguswa na huu mradi.

“Mkutano huu na kukutana kwetu mara kwa mara ni muhimu sana kwetu kwani itatujengea uwezo na kuuelewa mradi na kuwahabarisha vyema wananchi,” alisema Bw.Mziray na kuongeza kuwa mradi wa DART utabadilisha kabisa taswira ya jiji la Dar es Salaam.

Naye  msemaji kutoka Halmashauri ya Jiji la Dar-es-salaam, Bw. Gaston Makwembe  aliipongeza DART kwa kuandaa mkutano na maofisa habari na mawasiliano hao na kuweka utaratibu wa kukutana mara kwa mara na kujengea uwezo wa kuuelewa mradi.

“Mradi wa DART umefikia sehemu nzuri na wananchi wa Jiji la Dar es Salaam wanapaswa kufahamishwa kila hatua ya maendeleo ya Mradi, matumizi yake na umuhimu wa kuilinda miundombinu ambayo imeshakamilika,” alisema Bw.Makwembe.

Akichangia katika mkutano huo, Meneja Mawasiliano wa TANROADS, Bi. Aisha Malima  alisema taarifa sahihi zinahitajika katika mradi wa DART ili kufikisha ujumbe uliokusudiwa kwa jamii juu ya Mradi pasipo na upotoshaji.

“Taasisi zetu ni wadau wakubwa katika mradi huu mkubwa wa DART na hivyo ni vyema sisi wahusika wa mawasiliano tukafanya kazi kwa ukaribu na kuweza kuelimisha jamii juu ya maendeleo ya mradi,” alisema Bi. Malima.

Mkutano huo maalumu uliondaliwa na DART na kuhudhuriwa  na maafisa mawasiliano wa taasisi zinazohusika katika Mradi huo kwa lengo la kuwajengea uwezo na uelewa wa mradi huo kabla ya kukamilika kwa awamu ya kwanza mwishoni mwa mwaka huu.

Mwisho