Benki ya Afrika Tanzania yazidi kusaidia sekta ya elimu

Meneja wa benki ya Afrika Tanzania, tawi la Mtwara, Bw. Godfrey Chilewa (kushoto) akikabidhi vitabu kwa mwalimu mkuu wa shule ya sekondari ya Bandari, Mtwara, mwishoni mwa wiki, Bi. Somoe Ismail.  Benki hiyo ilitoa msaada wa vitabu 118.  Chombo hicho cha fedha kiko katika kampeni ya kusaidia sekta ya elimu nchini.

Na Mwandishi wetu, Mtwara

Benki ya Afrika Tanzania imeendelea na juhudi zake za kusaidia sekta ya elimu hapa nchini.

Katika tukio la hivi karibuni, benki hiyo tawi la  Mtwara imetoa msaada wa vitabu 118 kwa shule ya sekondari ya Bandari mkoani humo lengo likiwa kusaidia juhudi za serikali katika kuboresha shule za umma.

Meneja wa benki hiyo, Bw. Godfrey Chilewa amesema mwishoni mwa wiki mkoani humo kuwa kwa mwaka huu wamelenga kusaidia vitabu vyenye thamani ya Tshs milioni 15 katika shule mbalimbali nchini na kwa miaka ijayo wataangalia miundombinu mingine.

Shule ya sekondari ya Bandari ni mpya na inakabiliwa na changamoto nyingi vikiwemo vifaa vya kufundishia pamoja na miundombinu.

“Shule nyingi za umma zina changamoto nyingi ambazo zinatokana na uwezo wa serikali wa nchi zinazoendelea kushindwa kumudu kwa asilimia 100  gharama zote za maendeleo ikiwemo elimu,” alisema.

kwa upande wake,  mwalimu mkuu wa shule hiyo Bi. Somoe Ismail aliishukuru benki hiyo kwa msaada huo na kuomba wafadhili wengine kujitokeza kuisaidia shule hiyo ambayo ni mpya na ina kidato cha kwanza pekee huku ikiwa  inakabiliwa na changamoto nyingi.

Amezitaja changamoto hizo kuwa ni pamoja na uchache wa madarasa ambapo shule hiyo kwa sasa ina madarasa manne na wastani inatakiwa kuwa na madarasa kumi na sita, ukosefu wa maabara na vifaa vyake na madawati.

Naye, afisa elimu  taaluma sekondari manispaa ya Mtwara, Bw. Juma Chikonjo alisema sehemu kubwa ya shule sekondari katika manispaa hiyo zinakabiliwa na changamoto nyingi.

Hivyo ametoa wito kwa taasisi zingine kusaidia changamoto hizo ikiwemo ujenzi wa maabara ambapo amesema kati ya shule 13 za serikali zilizopo  katika manispaa hiyo ni shule sita tu ndiyo maabara zake zimekamilika.

Hata hivyo ametaka wanafunzi wa shule hiyo kuvitumia vitabu hivyo kwa manufaa yao ya baadae.

Vitabu vilivyotolewa ni vya masomo yote yakiwemo masomo ya sayansi.

kwa upande wa wanafunzi  wa shule hiyo ambao wapo 70 wamefurahia msaada huo na kusema kuwa vitawasaidia na kuahidi kusoma kwa bidii.

Mwisho