Urasimu utoaji vibali vya ujenzi kikwazo kwa maendeleo -TPSF

Mkurugenzi Mtendaji wa Taasisi ya Sekta Binafsi (TPSF), Bw. Godfrey Simbeye akizungumza wakati wa warsha ya kujadili ripoti ya mshauri mwelekezi kuhusu uboreshaji utoaji wa vibali vya ujenzi hapa nchini jana jijini Dar es Salaam.  Warsha hiyo inayomalizika leo imetayarishwa na TPSF.

Mkurugenzi Mtendaji wa Taasisi ya Sekta Binafsi (TPSF), Bw. Godfrey Simbeye (kushoto) akisisitiza jambo kwa Naibu Katibu Mkuu, Ofisi ya Waziri Mkuu, TAMISEMI, Bw. Kagyabukama Kiliba wakati wa warsha ya kujadili ripoti ya mshauri mwelekezi kuhusu uboreshaji utoaji wa vibali vya ujenzi hapa nchini jana jijini Dar es Salaam.  Warsha hiyo inayomalizika leo imetayarishwa na TPSF.

Na Mwandishi wetu, Dar es Salaam

Taasisi ya Sekta Binafsi nchini (TPSF) imesema Tanzania haiwezi kuendelea kukwamishwa na urasimu wa utoaji wa vibali vya ujenzi ambavyo vinarudisha nyuma juhudi za kujenga mazingira bora ya kufanya biashara na kuvutia uwekezaji.

Mkurugenzi Mtendaji wa Taasisi ya Sekta Binafsi (TPSF), Bw. Godfrey Simbeye amesema hivyo jana wakati wa warsha ya kujadili ripoti ya mshauri mwelekezi kuhusu uboreshaji utoaji wa vibali vya ujenzi hapa nchini.

“Suala la utoaji vibali vya ujenzi limekumbwa na changamoto ya urasimu ambao unachelewesha kupata vibali vya ujenzi na kusababisha hasara kwa sekta binafsi na kwa taifa,”alisema jana jijini Dar es Salaam.

Alisema ili nchi iweze kuondokana na changamoto hiyo inahitaji kuboresha mazingira ya usimamizi wa ardhi pamoja na utoaji wa vibali vya ujenzi.

Kwa sasa juhudi kubwa zinafanyika kuvutia wawekezaji wa ndani na nje lakini wanapokuwa tayari kujenga wanachukua miaka mingi kupata kibali cha ujenzi.

Alisema ucheleweshaji huo pia unasababisha kupoteza ajira, na fursa ya kutumia majengo yaliyokusudiwa kujegwa kama njia ya kuleta maendeleo.

Akitoa mfano alisema nchi jirani ndani ya Jumuiya ya Afrika Mashariki zimepiga hatua kubwa katika utoaji vibali hivyo kwa njia ya mtandao.

“Ni lazima tubadilike, wawekezaji tunaovutia ni hao hao,” alisema.

Alisema mpango elekezi wa kuboresha mazingira ya biashara unaosimiwa na Ofisi ya waziri Mkuu uliainisha upatakanaji wa vibali vya ujenzi kama eneo linalohitaji kuboreshwa na kuundiwa kikosi kazi cha serikali ambacho kilishirikisha sekta binafsi.

Kwa kutambua hilo sekta binafsi iliamua kuunda kikosi kazi chake ambacho kilikuwa kinafuatilia utekelezaji wa maboresho yaliyoainishwa kwenye mpango huo na kilifanya tafiti ya changamoto ya upatakanaji wa vibali hivyo.

“Kikosi kazi hiki kimekuja na ripoti ambayo tunaijadili hapa na tutatoa mapendekezo ya jisni ya kuzipunguza changamoto za ucheleweshaji utoaji vibali,”alisema.

Mkutano huo unamalizika leo.  

Alisema mapendekezo hayo baada ya kutolewa yatapelekwa serikali ili waweze kuyafanyia kazi na kuiondosha changamoto hiyo na changamto zingine ambazo nchi haifanyi vizuri kulingana na ripoti ya dunia inayotolewa kila mwaka.

Awali, Naibu Katibu Mkuu, Ofisi ya Waziri Mkuu, TAMISEMI, Bw. Kagyabukama Kiliba alisema hatua ya sekta binafsi kuandaa ripoti na kuijadili ni hatua ya msingi katika kujenga ushirikiano na serikali katika kutafuta ufumbuzi wa changamoto za kuboresha uwekezaji.

“Nawahakikishia sisi kama serikali tutayachukua mapendekezo yenu na kwenda kuyafanyia kazi kwa nia ya kuzidi kujenga mazingiara bora ya utoaji vibali vya ujenzi,”alisema.

Ofisi ya Waziri Mkuu, TAMISEMI, ndiyo inayohusika na utekelezaji wa mpango elekezi wa kuboresha mazingira ya biashara katika kiashiria cha vibali vya ujenzi.

Naye Mkurugenzi Mtendaji wa Tanzania Civil Engineering Contractors Association (TACECA), Bw. Clement Mworia alisema utoji wa vibali umekuwa ni tatizo kubwa katika sekta ndogo ya ujenzi na hiyo inarudisha nyuma maendeleo yake.

“Kumekuwepo na hali ya kuporomoka kwa majengo hapa nchini hasa Dar es Salaam, hii inasabishwa na urasimu wa utoaji vibali ambapo watu wanajenga bila ya halmashauri kukagua msingi wa ujenzi,”alisema.

Warsha hiyo inashirikisha wajumbe toka sekta binafsi na umma.

Mwisho. 

DAWASA yaelezea matumaini huduma ya maji Dar

Na Mwandishi Wetu, Pwani

Serikali imesema inafanya kila liwezekanalo kuhakikisha kuwa huduma ya maji katika jiji la Dar es Salaam inaimarika na kufikia wananchi wengi kadiri inavyowezekana.

Viongozi wa Mamlaka ya Maji Safi na Maji taka Dar-es-salaam (DAWASA) wamesema kuwa wanahakikisha miradi inayoendelea ya kuimarisha huduma ya maji inakamilika haraka na kwa muda uliopangwa ili kufanikisha lengo hilo.

Akizungumza na waaandishi wa habari wakati wa ziara ya kutembelea mitambo ya Ruvu Juu na Ruvu Chini hivi karibuni, Mwenyekiti wa bodi ya Dawasa Dkt.Eve Hawa Sinare amesema kwa upande wa Ruvu Chini upanuzi wa mitambo kwa asilimia 50 utaongeza  uwezo wa kusukuma maji lita milioni 270 kwa siku kutoka pale.

Awali mtambo huo ulikuwa na uwezo wa kusukuma maji lita milioni 182 kwa siku kwenda katika jiji hilo.

“Ongezeko hili litapelekea kupungua au kuisha kabisa kwa shida ya maji jijini Dar-es-Salaam na maeneo jirani,” alisema wakati wa ziara hiyo iliyoshirikisha pia wajumbe wa bodi wa Mamlaka hiyo.

Alifafanua kuwa ongezekezo hilo linakwenda sambamba na usambazaji maji hivyo shughuli iliyobaki ni kulaza mabomba kuelekea Dar-es-Salaam kwa ajili ya usambazaji ambapo zoezi hilo linaendelea kwa ufanisi mkubwa.

Mwenyekiti huyo aliongezea kusema kuwa anafurahishwa na kasi ya utendaji na kwamba kuna matarajio kuwa miradi hiyo itakwisha kwa muda uliopangwa.

“Kama bodi tunajivunia kuona miradi hii ya maji inakwenda kwa wakati uliopangwa,” alisema.

Kwa upande wake, Mkurugenzi Mtendaji wa DAWASA, Mhandisi Archard Mutalemwa alisema mitambo mipya imefungwa katika vyanzo vya maji vya Ruvu Juu na Ruvu Chini na kuwa hali hiyo itapelekea upatikaniji mkubwa wa maji jijini Dar-es-Salaam.

Alisema zoezi la ulazaji mabomba ya kusafirishia maji kutoka Ruvu Juu mpaka Kimara  umeshaanza na unahusisha mabomba matatu yenye kipenyo cha milimita 1200, 1000, na 900.

Aliongezea kuwa kutakuwa na ukarabati wa matenki ya maji yaliyopo kimara ili kuyafanya kuwa bora zaidi.

Pia Bw. Mutalemwa alielezea vyanzo vipya za maji vya kimbiji na Mpera na kuwa wameshaanza kuchimba visima ambavyo vikikamilika vitakuwa vinapeleka maji jijini Dar-es-salaam kwa zaidi ya lita milioni 260 kwa siku.

“Mara baada ya kukamilika kwa miradi yote hii mwakani tutakuwa na uhakika wa kupeleka maji jijini kwa zaidi ya lita milioni 756,000 kwa siku,” alisema Bw. Mutalemwa.

Alisema pamoja na kuwa na uhakika wa maji safi hapo baadaye kidogo, changamoto iliyopo ni namna ya kuwafikia wananchi wote jijini, hivyo wahandisi wasanifu wanafanya tathmini ya usambazaji maji kwa jamii hasa katika maeneo mapya.

Alisema changamoto nyingine ni namna ya uondoaji wa majitaka jijini kwani kwa sasa ni wananchi alisilimia 10 tu wanaofikiwa.

Wajumbe hao wa bodi walipanda miti katika maeneo ya mradi waliyotembelea kama kumbukumbu na pia kutekeleza sera ya serikali katika kutunza mazingira.

Mwisho.

UWADAR, DARCOBOA wafikia makubaliano na Simon Group

Na Mwandishi wetu, Dar es Salaam

Umoja wa wasafirishaji Dar es Salaam (UWADA) na Umoja wa Wamiliki wa Mabasi ya Abiria Dare s Salaam (DARCOBOA) wametiliana saini ya makubaliano na viongozi wa kampuni ya Simon Group kunganisha nguvu ili kuwa na nguvu ya kushiriki katika mchakato wa kuomba zabuni ya watoa huduma katika Mradi wa Mabasi Yaendayo Haraka (DART).

Makubaliano hayo yalifanyika mwishoni wa juma jijini Dar es Salaam na kushuhudiwa na Waziri wa Ofisi ya Waziri Mkuu TAMISEMI,Bi. Hawa Ghasia, Mkuu wa Mkoa wa Dar es Salaam, Bw. Meck Sadick na Mtendaji Mkuu wa mamlaka ya DART, Bi. Asteria Mlambo.

Wakati UWADAR iliwakilishwa na Mwenyekiti wake, Bw. William Masanja; huku DARCOBOA ikiwakilishwa na Mwenyekiti wake pia, Bw. Sabri Mabruk.

Simon Group iliwakilishwa na Mwenyekiti wake, Bw. Robert Kisena. 

Simon Group ndiyo inayoendesha Shirika la Usafiri Dar es Salaam (UDA).

Katika halfa hiyo, Waziri Ghasia alisema makubaliano hayo ni hatua muhimu kwa wamiliki wa vyombo vya usafiri jijini kuwa na nguvu ya pamoja na kujenga uwezo wa kuingia katika mfumo wa wa DART ambao unahitaji ufanisi mkubwa katika utoaji huduma.

“Uamuzi wenu ni mzuri...nawapongeza,” alisema.

Alifafanua kuwa serikali kupitia DART kwa sasa ipo katika hatua ya kutafuta watoa huduma katika mfumo huo na inatarajia kutangaza zabuni ambazo kampuni mbalimbali za ndani na nje zitatakiwa kuomba.

Alisema mfumo huo hauruhusu mmiliki mmoja mmoja bali kwa kupitia kampuni yenye sifa.

Alifafanua kuwa kipaumbele cha serikali ni kuona watanzania wanashiriki katika uwekezaji ili kuzidi kujenga uchumi na kuleta maendeleo. 

Naye Bw. Mabruk alisema serikali iliwashirikisha kikamirifu katika mchakato mzima tangu mradi ulipoanza hadi sasa unapoelekea kukamilika kwa awamu ya kwanza.

“Turishirikishwa tangu mwanzo na tulipelekwa hadi nje ya nchi katika mji wa  Bogota kujifunza jinsi wenzetu wanavyoendesha,”alisema.

Alisema jambo hilo haliepukiki kwa sababu ndiyo maendeleona kuwa wamiliki wa daladala wako tayari kushirikiana na kampuni hiyo ya UDA ili kujenga nguvu zaidi.

Alisema wamefanya maamuzi hayo kwa hiari na kila mmiliki atakayependa kuingia kushirikiana na kampuni hiyo atafanya kwa hiari kulingana na makubaliano yaliyofikiwa.

Naye, Bw. Kisena alisema shirika lake linapongeza hatua hiyo ambayo itawafanya kuwa na nguvu moja na kuwa washindani.

“Hatua hii itatuwezesha kuwa na nguvu ya kuwa washindani,” alisema.

Alisema kampuni yake inatoa fursa kwa wamiliki wa daladala kununua hisa za kampuni yao ili waweze kuwa ni sehemu ya ya kampuni hiyo.

Alisema pia shirika hilo litatoa fursa ya kwa watanzania wa kawaida wanaotaka kuwa sehemu ya kampuni yao kununua hisa ili waweze kuwa ni sehemu ya kampuni kwa ajili ya maendeleo ya nchi.

Awali, Mkuu wa Mkoa wa Dar es Salaam, Bw. Sadick alisema jambo hilo ni jema na linalenga wazawa kuwa na mwelekeo wa pamoja ili kuwekeza kwa kushirikiana na wataalamu wa kigeni.

Mwisho