TPA yafanya vyema Matokeo Makubwa Sasa

Na Mwandishi wetu, Dar es Salaam

Utekelezaji wa mkakati wa Matokeo Makubwa Sasa katika Mamlaka ya Bandari Tanzania (TPA) umeelezwa kuwa unakwenda vizuri.

Kwa mujibu wa ripoti iliyotolewa hivi karibuni inayoelezea utekelezwaji wa mkakati huo, pamekuwa na maendeleo makubwa na kuongezeka kwa ufanisi katika bandari ya Dar es Salaam kulinganisha na kipindi cha kabla ya mwezi wa saba mwaka jana.

Ripoti hiyo iliyotolewa na TPA inahusisha kipindi cha kati ya Julai 2013 na Machi 2014.

Pamoja na mambo mengine, mkakati wa Matokeo Makubwa Sasa unalenga kubadilisha bandari za Tanzania na hasa ile ya Dar es Salaam kuwa kitovu kikuu cha uchumi Tanzania na kuwa shindani katika ukanda huu wa Afrika.

Kwa mujibu wa ripoti hiyo, pamekuwa na ongezeko la mizigo katika bandari hiyo katika kipindi hicho kufikia tani milioni 10.95, hii ikiwa ni mafanikio kwa asilimia 84.2 kabla ya kufikia lengo la tani milioni 13 kwa kipindi cha mwaka 2013/2014.

Muda wa meli kukaa bandarini kwa mwezi Machi 2014 ilikuwa siku 6.1 kwa meli, mafanikio ya asilimia 82.0 kabla ya kufikia lengo la siku 5 kwa meli.  

Kwa mujibu wa ripoti hiyo muda wa kukaa kwa mizigo bandarini kutoka nje kwa mwezi Machi 2014 ilikuwa siku 10.0 kwa kontena kulinganisha na lengo la siku 7 kwa kontena.

“Hali hii imesababishwa na miundombinu mibovu ya reli na kutegemea usafirishaji kwa njia ya barabara kwa kiwango kikubwa,” inasema ripoti hiyo.

Uwezo wa kutoa magari bandarini umeongezeka kwa asilimia 100.7 kwa mwezi Machi 2014, magari 604 yakitolewa kwa awamu.

Ripoti hiyo imeendelea kusema kuwa kwa mwezi Machi 2014 lengo la kutumia siku 3 kwa lori moja la mizigo kuwa limeondoka bandarini limefikiwa kwa asilimia 81.1, kwani sasa lori moja linatumia siku 3.3.

Juhudi za kufanya bandari hiyo kufanya kazi kwa saa 24 kwa siku kwa siku saba za wiki ziko katika hatua za mwisho.  Ripoti ya makubaliano ya wadau wote wa serikali na sekta binafsi iliyofikiwa mwezi Februari mwaka huu itajadiliwa hivi karibuni tayari kwa utekelezaji.

Ikiongelea kuhusu mfumo wa “Single Window Port Community System” unaolenga kurahisisha kazi za nyaraka bandarini hapo, ripoti hiyo inasema tayari mfumo huo umeshaanza kutumika tangu tarehe 25 mwezi uliopita.

Mfumo wa Terminal operations system umeboreshwa ili kuondokana na changamoto zilizokuwepo hapo mwanzo.  Pia bandari kavu mpya zimeanza kutumia mfumo huu.

Mifumo mbalimbali ya kisasa imeanzishwa katika juhudi za kuongeza ufanisi bandarini hapo.

Mifumo hiyo ni pamoja na Harbour view system; Cargo Operations System; Container operations system; Motor vehicle operations system; Export receiving and loading operations system; Gate operations system na Billing System.

Mwisho