TIC yadhamiria kukuza zaidi wajasiriamali nchini

Na Mwandishi Wetu, Tanga

Kituo cha Uwekezaji Nchini (TIC) kimesema kitaendelea kuwasaidia wajasiriamali wadogo ikiwa ni njia mojawapo ya kuwajengea uwezo katika biashara zao ili waweze kukua na kukuza uchumi  wao na nchi kwa ujumla.

Mkurugenzi wa Huduma wa kituo hicho, Mama Nakuala Senzia ameyasema hayo wakati wa kufunga mafunzo ya siku sita ya wajasiriamali wadogo wapatao 27 wanaojishughulisha na ufugaji wa ng’ombe wa maziwa kutoka katika mikoa ya Pwani, Morogoro na Tanga.

“Mafunzo haya ni mwanzo tu wa kuwakuza wafugaji hawa ili waendelee kuuza maziwa yao kwa ufanisi zaidi,” alisema huku akikitaja kiwanda cha Tanga Fresh Ltd kama sehemu wafugaji hao wanapoweza kuuza maziwa yao.

Alisisitiza kuwa kituo hicho kitaendelea kushirikiana na serikali ya mkoa wa Tanga na  wadau wengine katika kuhakikisha wanawakuza wajasiriamali wadogo pamoja na kutangaza shughuli za uwekezaji katika mkoa huo.

“Mkoa wa Tanga una fursa nyingi, hivyo ni jukumu letu kushirikiana na taasisi nyingine kuwakuza wajasiriamali hawa na kutangaza uwekezaji katika jiji hili,” alisisitiza.

Aliongeza kua moja ya jukumu kubwa kwa sasa ni kuhakikisha wajasiriamali wadogo wanakua katika kila kona ya nchi ili kupunguza wimbi la utegemezi katika jamii na kuhakikisha fursa za uwekezaji zinatangazwa ndani na nje ya nchi.

“TIC kama moja ya taasisi za serikali tunatambua uwepo wa wajasiriamali wadogo na tunatambua kuwa wanahitaji kukua kibiashara, hivyo kwa kufanya hivi tunatimiza azma ya serikali katika kuwainua watu wetu,” aliongeza.

Aidha aliishukuru kampuni ya Tanga Fresh Ltd kwa kusimamia vema zoezi la uratibu hadi kupatikana wajasiriamali 27  na kuwaingiza katika programu hiyo ya mafunzo yanayoendeshwa kwa ushirikiano baina ya TIC na Shirika la Maendeleo la Umoja wa Mataifa linaloshughulikia Maendeleo na Biashara (UNCTAD).

Kwa upande wake, Katibu Mkuu Tawala wa wilaya ya Tanga, Bw. Marcelline Patrice, alisema TIC na Tanga Fresh Ltd wamefungua milango ya mafanikio kwa wajasiriali wa wilaya yake pamoja na mikoa jirani iliyoshiriki katika mafunzo hayo.

“Muwe makini katika kufanya biashara zenu, naamini sasa mtakua mmeiva kwa muda mliokaa hapa,” aliwaambia washiriki hao.

Aidha aliwataka wajasiriamali hao kutokuwa waoga katika suala la kuchukua mikopo katika taasisi za fedha kwani hiyo ndio njia ya kuweza kuwainua katika biashara zao.

“Wajasiriamali wengi wamekua waoga kuingia katika taasisi za fedha…waende huko kukopa, ndio mwanzo wa kukua kibiashara,” aliongeza.

Mmoja kati ya wajasiriamali waliopewa mafunzo hayo, Bi. Beatrice Chanika aliyaelezea mafunzo hayo kuwa ni mkombozi mkubwa katika shughuli zao za ufugaji.

“TIC waendelee kutusaidia ili tuweze kukua,” alisema Beatrice.

Aliongeza kuwa baada ya mafunzo hayo atakua na uwezo wa kuweka mahesabu yake katika kumbukumbu sahihi na kuwa atawaelimisha wengine jinsi ya kutunza maziwa ili yasiweze kuharibika kabla ya kuyapeleka sokoni.

“Elimu niliyopata nitasaidia wenzangu kule Mkinga wajue jinsi ya kuweka kumbukumbu na kutunza maziwa vizuri,” aliongeza.

Mwisho