Dar es Salaam mwenyeji wa mkutano mkubwa wa wanasayansi wiki ijayo

Mkurugenzi wa Taasisi ya Uthamini Raslimali (IRA) ya Chuo Kikuu cha Dar es Salaam (UDSM), Prof. Amos Majule (second right) akisisitiza jambo kwa waandishi wa habari jana jijini Dar es Salaam alipokuwa anatangaza mkutano mkubwa wa wanasayansi utakaofanyika kuanzia tarehe 27 mwezi huu Dar es Salaam.  Wengine pia wajumbe wa kamati ya maandalizi, Dk. Catherine Masao (kulia), Dk. Stephanie Duvail (pili kushoto) na Bw. Pellage Kauzeni (kushoto).

Na Mwandishi wetu, Dar es Salaam

Jiji la Dar es Salaam linatarajiwa kuwa mwenyeji wa kongamano kubwa la wanasayansi kutoka bara la Afrika na nje ya bara hilo wiki ijayo kuongelea mabadiliko yanayotokea sasa katika maeneo ya ardhi oevu na makutano ya mito na bahari.

Akitangaza mkutano huo jijini Dar es Salaam jana, mmoja wa wajumbe wa kamati ya maandalizi, Prof. Amos Majule alisema kongamano hilo litakalojulikana kama Afrideltas litafanyika kuanzia tarehe 27-30 May 2014.

Prof. Majule ambaye pia ni Mkurugenzi wa Taasisi ya Uthamini Raslimali (IRA) ya Chuo Kikuu cha Dar es Salaam (UDSM) alitoa wito kwa wadau mbalimbali wanaotaka kuhudhuria mkutano huo wa kihistoria kuhakikisha wanajisajili kwa wakati.

Prof. Majule alieleza kuwa kongamano hilo litahusisha wataalamu wa nje na ndani watakaoangalia na kufahamu zaidi faida zinazopatikana katika maeneo hayo ya ardhioevu na yale maeneo ambayo mto unakutana na bahari.

Alisema mkutano huo pia utapata taarifa mbalimbali za utafiti kutoka nchi nyingine kuhusu maeneo hayo na kubadilishana uzoefu baina ya wataalamu hao.

“Natoa wito kwa wadau wanaopenda kuhudhuria mkutano huu kujisajili mapema,” alisema, na kushauri kutembelea tovuti ya www.kenweb.or.ke au kuwasiliana na taasisi ya IRA kwa taarifa zaidi.

Mtaalamu huyo alisema kuna mabadiliko mengi yanayotokea sasa katika maeneo hayo kutokana na mabadiliko ya hali ya hewa na shughuli za binadamu na hayo yote yanatarajiwa kuangaliwa kwa kina katika kongamano hilo na kuja na maazimio kwa siku zijazo.

Mjumbe mwingine wa kamati ya maandalizi, Dk. Catherine Masao alisema maeneo hayo ni uhimu sana kwa kuwa binadamu wanayategemea kwa maisha yao.

“Maeneo haya yanasaidia na kubeba uhai wa wanyama na mimea,” alisema, na kuongeza kuwa pia maeneo ya ardhioevu yanasaidia katika kurekebisha athari za uchafuzi wa mazingira unaofanywa na binadamu.

Akielezea jinsi mabadiliko ya maeneo ya ardhioevu yanavyoathiri maisha ya watu katika bara la Afrika, mjumbe mwingine wa kamati hiyo, Dk. Stephanie Duvail alisema ujenzi wa mabwawa katika ukanda wa juu wa mto unaweza kusababisha mabadiliko na katika ardhioevu na kuathiri maisha ya watu.

Akitoa mfano, Bw. Pellage Kauzeni toka Wizara ya Maliasili na Utalii alisema bonde la Kilombero ni moja ya maeneo ya ardhioevu hapa nchini ambayo shughuli za kibinadamu zinapelekea mabadiliko kwa kiwango kikubwa katika eneo hilo.

Katika siku ya tatu ya mkutano huo, inatarajiwa kuwa wanasayansi wataungana na watunga sera na wadau wengine toka serikalini akiwemo Waziri wa Maliasili na Utalii, Bw. Lazaro Nyalandu ambae atafunga mkutano ili kujadiliana kuhusu majumuisho na hatua za kuchukua ili kulinda maeneo hayo.

Mwisho.

Benki ya Afrika Tanzania yatoa msaada wa vitabu

Na Mwandishi wetu, Dar es Salaam

Katika kuhakikisha inasaidia sekta ya elimu, Benki ya Afrika Tanzania imezindua programu ya kusaidia sekta hiyo vitabu katika shule za sekondari nchini.

Kwa kuanza, benki hiyo imetoa vitabu kwa shule ya sekondari Tandika ambayo imepatiwa vitabu vya sayansi na arts ili kuwawezesha wanafunzi wake kufanya vizuri kimasomo.

Meneja Mwandamizi wa Masoko na Mawasiliano wa benki hiyo, Bw.Solomon Haule alisema mara baada ya kukabidhi vitabu hivyo jana jijini Dar es Salaam kuwa benki yao imezindua programu hiyo ili kuwezesha wanafunzi kufanya vizuri kimasomo.

“Benki yetu imetenga sehemu ya faida yake katika mwaka huu wa fedha kwa ajili ya kusaidia sekta ya elimu ili kuunga mkono juhudi zinazofanywa na serikili katika sekta ya elimu,”alisema Bw. Haule.

Alisema benki yao inatambua kuwa serikali pekee haiwezi kufanya kila kitu na badala yake  wadau mbalimbali wanahitajika kushiriki katika kulijenga taifa hasa katika sekta ya elimu na nyingine.

“Baada ya kutoa msaada huu tutaendelea katika shule nyingine ili kuziwezesha shule  nyingi kuwa na vitabu vya kutosha,”alisema.

Mwalimu Mkuu wa shule hiyo, Bw.Hussein Mpugus alisema vitabu hivyo vitasaidia wanafunzi kufanya vizuri katika masomo yao.

“Tunashukuru kwa dhati kupata vitabu hivi...ni msaada mkubwa,”alisema.

Alisema mahusiano hayo yaliyojengwa kati ya shule yake na benki yanapaswa kuzidi kuendelezwa kwa vile yanalenga kuboresha elimu inayotolewa shuleni hapo kwa mafufaa ya wanafunzi na taifa.

Aliihakikishia benki hiyo kuwa watavitumia vitabu hivyo kwa uangalifu ili hata wanafunzi wengine watakao kuja waweze kuvikuta na kuvitumia.

Naye Kaka Mkuu wa Shule hiyo, Bw. Hamza Msanga alisema shule yao ilikuwa na changamoto ya vitabu kwa wanafunzi na kuwa sasa imepatiwa majibu na benki hiyo.

“Tutahakikisha tunasoma kwa bidii...huu ndiyo msaada ambao wanafunzi tunastahili kupatiwa,” alisema.

Aliziomba taasisi nyingine kuiga mfano ulioonyeshwa na benki hiyo ili kuweza kuisaidia shule yao ambayo ina changamoto mbalimbali.

Bank of Africa Tanzania ilianza huduma zake zaidi ya miaka 30 iliyopita huko Bamako, Mali.

Kwa hapa nchini, benki hii ina zaidi ya miaka saba ikihudumia makampuni makubwa pamoja na kada ya wajasiriamali wadogo na wa kati.

Kwa sasa ina matawi katika mikoa ya Dar es Salaam (yenye matawi kumi), na mengine katika mikoa ya Arusha, Kilimanjaro, Morogoro, Mtibwa, Mbeya, Tunduma, Mwanza, Kahama na sasa Mtwara.

Mwisho.

Benki ya Wanawake kuwahudumia watanzania ughaibuni

Mkurugenzi Mtendaji wa Benki ya Wanawake Tanzania (TWB), Bi. Margareth Chacha akiwa katika picha ya pamoja na Watanzania waishio nchini Marekanin hivi karibuni huko Chicago.

Na Mwandishi Wetu, Dar es Salaam

BENKI ya Wanawake Tanzania (TWB) imeanziasha utaratibu  au hudama wa kibenki ambayo itawawezesha wanawake wa Kitanzania wanaoishi ughaibuni kuchangia katika shughuli mbalimbali za kijamii na uchumi hapa nchini.

Mkurugenzi Mtendaji wa Benki hiyo, Bi. Margareth Chacha,aliwaambia waandishi wa habari mwishoni mwa wiki kuwa hivi karibuni wanawake waishio Washington, Virginia and Maryland (DMV) walituma mwaliko kwa benki yake kwenda kuwaelezea ninamna gani watanufaika endapo watawekeza kwenye benki hiyo..

“Nilikutana nao Chicago na tulikuwa na mazungumzo marefu na yaliyozaa matunda na vilevile niliwahakikishia ni namna gani benki ilivyojidhatiti kuwajengea uweza wanawake na vijana hapa nchini,” aliongeza.

Alisema wanawake hao pia walitaka kujua kama TWB ina sera yeyote ambayo inaweza kuwasaidia wanawake ambao wanaishi ughaibuni na pia kutoa kipaumbele kwa ukombozi wa mwanamke( women empowerment).

Bi. Chacha alisema, Watanzania wengi wanaoishi Marekeni na nchi nyingine za ughaibuni wanashindwa kuunga mkono shughuli mbalimbali za kijamii na maendeleo hapa nchini kwa sababu wanawasiwasi ya kupotea kwa fedha zao.

“Tulijadiliana kwa kirefu na kukubaliana kuwa benki itakuwa inasimamia pesa zao zinafanya kazi ambazo wamekusudia,” aliongeza mkurugenzi huyo mtendaji.

Kwa mujibu wa Bi.Chacha, wanawake hao waishio ughaibuni mara nyingi huwa wanashindwa kununua bidhaa kutoka Tanzania kwa kuhofia gharama na mara nyingine inalazimika kumtuma mtu kuja kuzifuata.

“Tumewathibitishia kuwa Benki ya Wanawake watasimia ununuzi wa bidhaa hizo toka Tanzania na kuzituma Marekani bila kupitia mkononi mwa Dalalali,” alisisitiza Bi.Chacha.

Amesema benki yake imeshafungua mtandao ambao utakaotumiwa na wanawake hao kutoka Tanzania iliwaweze kuingiza na kutoa pesa bila wao kuwepo Tanzania.

“Benki ya Wanawake imeona kuna fursa kubwa endapo watanzania waishio ughaibuni watashirikishwa vilivyo katika kuchangia kwenye shughuli za kijamii na uchumi,” alisisitiza Bi.Chacha.

Bi. Chacha alisema kuwa watanzania wengi aliokutana nao Marekani wameonyesha nia kubwa ya kuja kujenga nyumba/makazi hapa Tanzania na wameiomba benki isimamia mchakato mzima wa upatikanaji wa viwanja.

Tangu kuanzishwa kwake ndani ya miaka minne tu, Benki imekuwa mstari wa mbele kuhakikisha kuwa inamkoa mwanamke mjasirialiamali na kijana katika kukuza biashara na kuongeza kipato. Tayari imeshatoa zaidi ya bilioni ishirini mikopo kwa wajasiriamali wa wanawake na vijana ilikukuza mitaji yao.

Mwisho.